«Քաղաքացիական պայմանագիր» կուսակցության՝ Գեղարքունիքի մարզի Լիճք համայնքի 21/7 տեղամասում գտնվող վստահված անձինք ծեծել են «Ուժեղ Հայաստան» կուսակցության վստահված անձ Լևոն Հոխիկյանին, որը հանրային գործիչ Նաիրի Հոխիկյանի եղբայրն է։ Նա News.am-ի լրագրողին պատմել է, որ կոնֆլիկտն առաջացել է ընտրատեղամասում, երբ նա նկատել է, որ ընտրատեղամասում ՔՊ–ից 3 վստահված անձ կա։
«Նույն ընտրատեղամասում 3 հոգի ներկա են գտնվել ՔՊ վստահված անձանցից, պահանջեցի, որ հետևեն օրենքի պահանջին, քանի որ օրենքը 2 հոգու է թույլատրում։ Այդ ժամանակ բուն ընտրատեղամասում պարզապես կոնֆլիկտ եղավ՝ առանց ուժի կիրառման։ Հետո՝ տեղամասից մոտ 200 մետր հեռավորության վրա, արդեն տեղի ունեցավ ֆիզիկական բռնություն՝ նույն անձանց կողմից։ Հարվածում էին հիմնականում դեմքիս»,– պատմել է Հոխիկյանը։
Լևոն Հոխիկյանը նշել է, որ ներկայացրել է նաև հանցագործության մասին հաղորդում։
Հանձնաժողովի նախագահ Էդգար Սիրեկանյանը չհերքելով միջադեպը՝ նշել է, թե տեղամասում խոսակցություն է եղել, սակայն ընտրության բնական ընթացքն ապահովելու համար նրանց դուրս են հրավիրել։ Ըստ Սիրեկանյանի` տվյալ անձինք հետ չեն վերադարձել տեղամաս։ Նրա խոսքով` իրենք էլ արձանագրել են վստահված անձին և մինչև կոնֆլիկիտ արդեն դուրս էին հրավիրում տեղամասից։
Հիշեցնենք` այսօր Հայաստանում խորհրդարանական ընտրություններ են անցկացվում, մասնակցում է 18 քաղաքական ուժ՝ 16 կուսակցություն և 2 դաշինք: Ընտրելու իրավունք ունի 2 միլիոն 503 հազար 976 քաղաքացի։
Ժամը 14-ի դրությամբ քվեարկել է ընտրության իրավունք ունեցող 847 226 քաղաքացի (33,84%-ը)։
Sputnik Արմենիա
