Իրանի հյուսիսարևելյան Մաշհադ քաղաքի Իմամ Ռեզայի դամբարանային համալիրում, որտեղ օրերս թաղվել էր երկրի հանգուցյալ գերագույն առաջնորդ այաթոլլա Սեյիդ Ալի Խամենեին, այսօր կեսօրին հրդեհ է բռնկվել: Համալիրի տարածքը պատվել է խիտ ծխով։
Ըստ fararu.com վերլուծական-լրատվական կայքի` հրդեհը բռնկվել է արհեստանոցում, որը զբաղվում է «Ամիր ալ-Մումինին» (բարձրագույն ղեկավարության դամբարան) և «Ղադիր հրապարակ» մասշտաբային նախագծերի շրջանակում օբյեկտի վերակառուցման աշխատանքներով։ Պատճառը բիտումի և պլաստիկի բռնկումն է։
Հրդեհի մասին հաղորդումից անմիջապես հետո դեպքի վայր են մեկնել Մաշհադի հրշեջ ծառայության օպերատիվ ստորաբաժանումները։ Պարզվել է, որ կրակը տարածվել է 500 քմ մակերեսով տարածքում։ Հրշեջներն անհրաժեշտ քայլեր են ձեռնարկել կրակը մեկուսացնելու և տարածումը կանխելու համար:
Զոհեր և տուժածներ չկան: Ճարտարապետական կառույցները նույնպես չեն տուժել։
Հիշեցնենք` Խամենեին սպանվեց ամերիկա–իսրայելական հարվածների առաջին օրը՝ փետրվարի 28-ին։ Լուրը պաշտոնապես հաստատվեց մարտի 1-ին։
Նրա մահից հետո Իրանի նոր գերագույն առաջնորդ դարձավ նրա որդին՝ Մոջաթաբան, որը վնասվածքների պատճառով և անվտանգության նկատառումներից ելնելով մինչ օրս չի ներկայացել հանրությանը, բայց հանդես է եկել Իրանի ժողովրդին ուղղված մի շարք ուղերձներով:
Sputnik Արմենիա
