Միացյալ Նահանգները քննարկում է այս հանգստյան օրերին Իրանին նոր հարվածներ հասցնելու հնարավորությունը։ Այս մասին CNN հեռուստաալիքին հայտնել են վարչակազմի ծրագրերին ծանոթ ամերիկացի երկու պաշտոնյաներ։
Այնուամենայնիվ, գործողության ճշգրիտ մասշտաբն ու հնարավոր թիրախները դեռևս որոշված չեն։ Աղբյուրներն ընդգծել են, որ վերջնական որոշում դեռ չկա, և գործողությունը կարող է նույնիսկ չեղարկվել։
Ուրբաթ օրը կայացած կառավարության նիստի ընթացքում ԱՄՆ նախագահ Դոնալդ Թրամփը հայտարարել է Իրանի դեմ լայնամասշտաբ ռազմական գործողությունների հնարավոր վերսկսման մասին՝ դժգոհություն հայտնելով, որ դիվանագիտական ջանքերն այդպես էլ ցանկալի արդյունքի չեն հանգեցրել։
Ամերիկացի պաշտոնյաների փոխանցմամբ՝ Թրամփը ձգտում է հասնել հակամարտության ավարտին, սակայն ռազմական ճնշման մեծացումը դիտարկում է որպես այդ նպատակին հասնելու միջոցներից մեկը։
Առայժմ հայտնի չէ, թե կոնկրետ որ օբյեկտները կարող են դառնալ հնարավոր հարվածների թիրախ, և արդյոք գործողությունն իրականացվելու է ԱՄՆ դաշնակիցների մասնակցությամբ։
News.am
