Բաքվի վերաքննիչ դատարանում ավարտվել է հայ գերիների վերաքննիչ բողոքների «քննությունը»։ «Դատական կազմը» անցել է «որոշման» քննարկմանը։ Այս մասին հայտնում են ադրբեջանական ԶԼՄ-ները։
Նշվում է, որ օրը «նիստի» ընթացքում Լեռնային Ղարաբաղի նախկին ղեկավար Բակո Սահակյանը դիմել է «դատարանին»՝ միջնորդելով բեկանել առաջին ատյանի «դատավճիռը» և արդարացնել իրեն։
«Մեղադրող» կողմին պատասխանելու իրավունքից օգտվել են նաև Վասիլ Բեգլարյանը, Արկադի Ղուկասյանը, Լևոն Մնացականյանը, Մադաթ Բաբայանը, Գուրգեն Ստեփանյանը, Դավիթ Մանուկյանը, Դավիթ Իշխանյանը, Դավիթ Բաբայանը, Մելիքսեթ Փաշայանը, Գարիկ Մարտիրոսյանը, Դավիթ Ալլահվերդյանը, Լևոն Բալայանը և Էրիկ Ղազարյանը, ինչպես նաև նրանց «փաստաբաններից» մի քանիսը։
Նրանք ներկայացրել են իրենց փաստարկները և հայտարարել, որ առաջադրված «մեղադրանքներով» իրենց մեղավոր չեն ճանաչում։
«Փաստաբանները» դիմել են «դատարանին»՝ խնդրելով բեկանել նախորդ ատյանի «վճիռները» և արդարացնել իրենց պաշտպանյալներին։
Այնուհետև ելույթ են ունեցել «տուժողների» ներկայացուցիչները և դատախազները։
«Նախագահող դատավոր Էլմար Ռահիմովը հայտարարել է վերաքննիչ բողոքների «դատական քննության» ավարտի մասին։ Դատական կազմն անցել է խորհրդակցական սենյակ՝ որոշում կայացնելու»,- ասված է Ադրբեջանի պետական ԶԼՄ-ների տարածած հաղորդագրության մեջ։
Sputnik Արմենիա
