2024 թվականի հունիսի 12-ին ուժայինների գործողություններից տուժած քաղաքացիները հանդիպում են ոչ թե պետության օգնությանը, այլ բախվում են արդարություն պահանջելու համար կրկնակի քրեական հետապնդումների։ Այս մասին մամուլի ասուլիսի ժամանակ հայտնել է փաստաբան Հովհաննես Խուդոյանը։
Որպես օրինակ՝ իրավաբանական թիմը ներկայացրել է Եսայի անունով մի քաղաքացու պատմությունը, որը ստացել է ծանրագույն վնասվածք և հաշմանդամություն բողոքի ակցիաների ժամանակ ոստիկանության կիրառած լուսաձայնային նռնակի պայթյունի հետևանքով։
«Եսային հաշմանդամություն է ստացել, նրա մատները պոկվել են։ Թվում է, թե իրավական պետությունում նման մարդու նկատմամբ պետք է լինի առանձնահատուկ ուշադրություն։ Սակայն նախընտրական քարոզարշավի ընթացքում, պատահաբար հանդիպելով Ալեն Սիմոնյանի ավտոշարասյանը, նա պարզապես ցույց է տվել իր խեղված ձեռքը և ասել. «Դրա համար դուք օրենքով պատասխան եք տալու»։ Դրանից հետո նրա տանը խուզարկություններ են իրականացվել, առգրավվել են իրեր, և այսօր նրան մեղադրանք է առաջադրվել իբր հնչեցված սպառնալիքների համար։ Ոստիկանության կամայականություններից տուժած մարդու հանդեպ հոգատարության փոխարեն նրան կրկին ենթարկում են հետապնդման»,- պատմել է Հովհաննես Խուդոյանը։
Փաստաբանը նաև հավելել է, որ այս դրվագը, մյուս արձանագրված խախտումների հետ միասին, որպես իրավախախտումների համակարգային բնույթի և Հայաստանում քաղաքացիների նկատմամբ ճնշումների ապացույց, կփոխանցվի ՄԱԿ փորձագետներին։
Հիշեցնենք, որ 2024 թվականի հունիսի 12-ին Երևանում, Ազգային ժողովի շենքի մոտ, տեղի էին ունեցել կոշտ բախումներ արքեպիսկոպոս Բագրատ Գալստանյանի գլխավորած «Տավուշը հանուն հայրենիքի» բողոքի շարժման մասնակիցների և իրավապահ ուժերի միջև։ Ցուցարարներին ցրելու համար ոստիկանությունը կիրառել էր լուսաձայնային նռնակներ և հատուկ միջոցներ։ Բախումների հետևանքով տուժել էր շուրջ 100 մարդ, այդ թվում՝ քաղաքացիական անձինք, ոստիկաններ և լրատվամիջոցների ներկայացուցիչներ։ Առողջապահության նախարարության տվյալներով՝ մի քանի մարդ ստացել էր ծանր բեկորային վիրավորումներ և վերջույթների վնասվածքներ։
News.am
