«Ուժեղ Հայաստան» դաշինքի առաջնորդ Սամվել Կարապետյանի ամենամտերիմ համախոհներից մեկի` ընդդիմադիր գործիչ Ալիկ Ալեքսանյանի հետ տեսակցություններն արգելված չեն, սակայն նա շուրջ երկու ամիս չի տեսել որդուն։ Այս մասին Sputnik Արմենիայի թղթակցին պատմեց նրա փաստաբան Լիանա Գասպարյանը։
Նա նշեց, որ Ալեքսանյանը գրեթե երկու ամիս է, ինչ կալանքի տակ է, բայց որևէ քննչական գործողություն նրա հետ չի իրականացվել։ Ավելին, քաղաքական գործչի երկամսյա կալանքի ժամկետը լրանում է օգոստոսի 3-ին, և դեռ հայտնի չէ, թե արդյոք քննչական մարմինը միջնորդելո՞ւ է այն երկարաձգելու համար, թե՞ ոչ։
Ավելի վաղ «Ուժեղ Հայաստան» խմբակցության ընտրված պատգամավոր Նարեկ Կարապետյանը, որին նույնպես ներգրավել են Ալեքսանյանի գործով, նշել է, որ քաղաքական գործիչների կալանավորման հետ կապված պատմություններում ամենախոցելին երեխաներն են։ Նա պատմել է, որ աշնանը, փաստաբան Ռուբեն Մխիթարյանի ձերբակալման ժամանակ, նրա որդին չգիտեր, թե որտեղ է հայրը և շատ էր կարոտում նրան։ Այդ ժամանակ Ալեքսանյանն այցելեց փոքրիկ տղային և նրան հոր անունից խաղալիք փոխանցեց։
«Այսօր Ալիկի տղան` Բենը, չգիտի, թե ուր է հայրիկը։ Նրան ասել են որ հայրիկը Գյումիրում է, հարցնում է` երբ է գալու: Ամեն կալանքի հետևում կան սպասող երեխաներ, կանայք, անձնական շատ պատմություններ: Մեր այն հայրենակիցներին, ովքեր անսալով իշխանական քարոզչությանը, երբեմն չեն գիտակցում` ինչ է կատարվում Հայաստանում` բացե՛ք ձեր աչքերը.. բացե՛ք ձեր աչքերը…», – գրել է քաղաքական գործիչը։
Ալիկ Ալեքսանյանը մեղադրվում է խոշոր չափերի փողերի լվացման և ընտրակաշառք տալու մեջ։ Քննչական կոմիտեի տվյալներով՝ Ալեքսանյանը, լինելով «Մեր ձևով» հասարակական կազմակերպության հիմնադիր և գործադիր տնօրեն, 2025 թվականի հոկտեմբերից մինչև 2026 թվականի մարտը «Տաշիր» հիմնադրամից ստացել է մոտ 4,4 մլն դոլար և 230 հազար եվրո՝ նվերների և փոխառությունների տեսքով։
Ավելի վաղ գլխավոր դատախազությունը հանրային քրեական հետապնդում էր սկսել Նարեկ Կարապետյանի նկատմամբ։ Այն կապված է Ալեքսանյանի գործի հետ։
