«Արդար քվե» առաքելություն․ Նման երևույթները կասկածի տակ են դնում ընտրությունների արդյունքների լեգիտիմությունը (ՏԵՍԱՆՅՈՒԹ)

«Արդար քվե» դիտորդական առաքելությունը պատրաստել է քարոզարշավի վերաբերյալ երրորդ միջանկյալ զեկույցը։ Զեկույցը ներկայացվել է հունիսի 5-ին։ Հիշեցնենք, որ ընտրությունները կանցկացվեն հունիսի 7-ին, իսկ հունիսի 6-ին երկրում լռության օր է։

Ինչպես մամուլի ասուլիսի ժամանակ հայտնել է «Արդար քվե» դիտորդական առաքելության ղեկավար Սոնյա Համբարձումյանը, անցած երկու շաբաթվա ընթացքում գրանցվել է 382 խախտում։ Դրանց ճնշող մեծամասնությունը՝ 36,4 տոկոսը, վերաբերում է ապօրինի քարոզչությանը։ 28 տոկոսը վերաբերում է վարչական ռեսուրսի օգտագործմանը, 12 տոկոսը՝ ատելության խոսքին, 6,5 տոկոսը՝ ընտրակաշառքին. այս տվյալները ստացվել են պաշտոնական քննչական մարմիններից։ Իշխանությունների կամ տեղական մարմինների կողմից ճնշումը կազմել է 4,7 տոկոս։ Դեպքերի մեծ մասը բաժին է ընկնում Երևանին, Արագածոտնին, Սյունիքին, Լոռուն, Արարատին։

Համբարձումյանը նշել է, որ բացահայտվել են համայնքային ծառայությունների աշխատակիցների մասնակցության դեպքեր ապօրինի քարոզչությանը, իսկ ամենավրդովեցուցիչը ընտրական հանձնաժողովների ներկայացուցիչների մասնակցությունն է քարոզարշավին, ինչն օրենքով արգելված է։ Ստացված տվյալները ներկայացվել են ԿԸՀ։ Համբարձումյանը շեշտել է, որ նման երևույթները կասկածի տակ են դնում ընտրությունների արդյունքների լեգիտիմությունը։

«Արդար քվե» դիտորդական առաքելության հանրային կապերի մենեջեր Աստղիկ Ավետիսյանն ավելացրել է, որ լրատվամիջոցների շնորհիվ ստացվել է բավականաչափ տեղեկատվություն։ Նրա խոսքով՝ ուսուցիչներից «թեժ գծին» տրվել են հաղորդումներ իշխանությունների օգտին քվեարկելու պահանջով գործադրվող ճնշման մասին, եղել են հաղորդումներ նաև ընտանիքներում քաղաքական հարցերի պատճառով բուռն սկանդալների մասին։ Բացահայտվել են աշխատանքից ազատման կամ սոցիալական ցանցերում «լայքերի» համար տույժի ենթարկելու դեպքեր, հաշվեհարդարի սպառնալիքներ, իսկ երեկվանից սկսել են ստացվել հաղորդումներ արտերկրից երկիր ժամանող հայրենակիցներին զինվորական հավաքների ուղարկելու փորձերի մասին։

Առաքելությունը կներկայացնի ևս մեկ միջանկյալ զեկույց։ Նշենք, որ թեժ գծին և կայքին ուղարկվող հաղորդումները կարող են լինել անանուն, եթե մարդը գտնվում է ճնշման տակ կամ վախենում է հակազդել, օրինակ՝ ապօրինի քարոզչությանը։

News.am