Այն, ինչ այսօր ՀՀ վարչապետ Նիկոլ Փաշինյանն անում է, միտված է Ռուսաստանի հետ հակասություններն է՛լ ավելի լարելուն, էսկալացիա առաջացնելուն։ Այսօր «Արմենիա» հեռուստաընկերության եթերում այս հայտարարությունն արեց ՀՀ երկրորդ նախագահ, «Հայաստան» դաշինքի վարչապետի թեկնածու Ռոբերտ Քոչարյանը՝ պատասխանելով այն հարցին, թե որքանով է հնարավոր, որ Հայաստանը սկսի արտահանումներ իրականացնել դեպի ԵՄ։
Երեկ Գեղարքունիքի մարզում նախընտրական հանդիպումների ժամանակ Փաշինյանը հայտարարեց, թե բիզնես պատվիրակություններ են գործուղվել բանակցությունների, Հայաստանի արտահանման առաջին խմբաքանակը ճանապարհին է (չնշեց, թե որ ուղղությամբ), նաև խոստացավ, որ կառավարությունն աջակցություն կտրամադրի այն ֆերմերներին, որոնց արտադրանքի արտահանումն անարդարացիորեն սահմանափակվել է։ Այսօր հայտնի դարձավ, որ Փաշինյանը հեռախոսազրույց է ունենալու Եվրահանձնաժողովի նախագահ Ուրսուլա ֆոն դեր Լյայենի հետ՝ քննարկելու Եվրամիության աջակցությունը Հայաստանին՝ Ռուսաստանի կողմից կիրառվող տնտեսական սահմանափակումների ֆոնին։
«Հայաստանի իշխանությունը շարունակում է այս կոնֆրոնտացիայի էսկալացիայի ճանապարհը։ Ինքն ուզում է Ռուսաստանին ցույց տալ, որ ես այլընտրանք ունեմ։ Սա էսկալացիայի ճանապարհ է, չունի այլընտրանք։ Այս 8 տարիների ընթացքում ի՞նչ են արտահանել ԵՄ գյուղատնտեսական ապրանքների առումով։ Ոչինչ կամ գրեթե ոչինչ։ Եվրոպական շուկան չափազանց պաշտպանված է, ԵՄ երկրների ֆերմերները երբեք թույլ չեն տա իրենց կառավարություններին ինչ-որ կերպ ոտնահարել իրենց շահերը։ Մենք տեսնում ենք նույնիսկ Ուկրաինայի պարագայում, թե Լեհաստանում ֆերմերներն ինչ են անում՝ ուղղակի փակում են ճանապարհներն ուկրաինական գյուղարտադրանքի դիմաց»,- ասաց Քոչարյանը։
Նա վստահ է, որ սա պարզապես նախընտրական հնարք է՝ քաղաքացիներին ցույց տալու, թե հարցերը կկարգավորվեն, սակայն վստահ է՝ չի ստացվելու, որովհետև խնդիրները լուրջ են և խորը։
Անդրադառնալով կառավարության հայտարարած աջակցության ծրագրին՝ Քոչարյանն ընդգծեց՝ այդ ծավալը հնարավոր չի փոխհատուցել։
«Եթե որևէ մեկը մտածում է՝ հնարավոր է գյուղատնտեսությունը փակել ու ամբողջ ծավալով կոմպենսացնել, ուրեմն այդ մարդն ընդհանրապես չի պատկերացնում խնդրի ծավալն ու խորությունը»,- նշեց Քոչարյանը։
Նրա խոսքով՝ Հայաստանն արեց ամեն ինչ ԵՄ-Ռուսաստան հակասությունների բախման կենտրոնում հայտնվելու համար։ ՀՀ երկրորդ նախագահը շեշտեց` յուրաքանչյուր մեծ պետությունն իհարկե ունի աշխարհաքաղաքական իր շահերը, հատկապես, երբ խոսքն իր սահմանների երկայնքի մասին է։ Վստահ է, որ Ռուսաստանն էլ այստեղ շահեր։
«Իհարկե ունի, և անհամադրելի են Ռուսաստանի շահերն այստեղ Եվրամիության շահերի հետ։ Ըստ էության, մենք արհեստական ձևով մտցվել ենք մի օրակարգի մեջ, որը Հայաստանի շահերից չի բխում»,- ասաց Քոչարյանը։
Ըստ նրա՝ Հայաստանը պետք է կարողանա այնպիսի հավասարակաշռված քաղաքականություն վարի, որ և՛ չփչացնի հարաբերությունները Ռուսաստանի հետ, և՛ փորձի լավ, դինամիկ, արդյունավետ հարաբերություններ ունենալ ԵՄ-ի հետ։
Sputnik Արմենիա
