Իսրայելը Թրամփի վարչակազմին հայտնել է, որ սիրիական ավիաբազայի վրա իր վերջին հարձակումը նպատակ ուներ կանխել այդ շրջանում Թուրքիայի ռազմական ներկայության ընդլայնումը։ Այդ մասին Axios-ին հայտնել են ամերիկացի և իսրայելցի պաշտոնյաներ։
Հարվածը տեղի է ունեցել երեքշաբթի վաղ առավոտյան՝ տեղական ժամանակով։ Առնվազն ութ ռումբ ընկել է Սիրիայի հյուսիսում՝ թուրքական սահմանից մոտ 72 կիլոմետր հեռավորության վրա գտնվող Աբու ալ-Դուհուր ավիաբազայի թռիչքուղիների և մի քանի անգարների վրա։
Ամերիկացի և իսրայելցի պաշտոնյաների խոսքով՝ Իսրայելի կառավարությունը նախապես տեղեկացրել էր Սպիտակ տան ներկայացուցիչներին սպասվող հարվածի մասին։
Մոտ երեք ժամ առաջ Թրամփը հեռախոսազրույց էր ունեցել Էրդողանի հետ, սակայն պարզ չէ՝ արդյոք այդ հարցը քննարկվել է։
Իսրայելցիները Սպիտակ տանն ասել են, որ հարվածը նպատակ ուներ զսպել Թուրքիային ավիաբազա ժամանակակից սպառազինության համակարգերի խմբաքանակ ուղարկելուց, ինչպես նաև կանխել այդ օբյեկտում ռազմական հզորության ավելի լայն ծավալմամբ ուժեղացումը։
Թուրք պաշտոնյան հերքել է Իսրայելի հայտարարությունները։ «Ավիաբազայում թուրքական որևէ ներկայություն չի եղել։ Իսրայելը պատրվակներ է հորինում հարևան երկրները ռմբակոծելու և տարածաշրջանն ապակայունացնելու համար», — հայտարարել է պաշտոնյան։
Ամերիկացի որոշ բարձրաստիճան պաշտոնյաներ կարծում են, որ հարվածը մասամբ պայմանավորված էր Իսրայելում հոկտեմբերին կայանալիք ընտրություններով։
Թրամփի վարչակազմի ներկայացուցիչները սիրիական կառավարությանը կոչ են արել զսպվածություն ցուցաբերել՝ ընդգծելով, որ Իսրայելում ընտրություններից հետո այս հարցը լուծելն ավելի հեշտ կլինի, հայտնել են ամերիկացի պաշտոնյաները։
News.am
