Հայաստանի կառավարությունը հավանություն է տվել ագրարային ոլորտի աջակցության ծավալուն ծրագրին, որով շուրջ 2 միլիարդ դրամ կփոխհատուցվի ջերմատնային պտուղբանջարեղեն և ծաղիկներ արտահանողներին՝ Ռուսաստանի սահմանափակումների ֆոնին սպառման նոր շուկաներ գտնելու նպատակով։
Գործադիրի նիստում հաստատված նախագծի համաձայն՝ 2026 թվականի հունիս ամսվա ընթացքում հանրապետությունից արտահանված ապրանքների համար տնտեսավարողներին կտրամադրվեն հստակ սահմանված սուբսիդիաներ։ Պետությունը պարտավորվել է ելակի յուրաքանչյուր կիլոգրամի համար վճարել 770 դրամ, լոլիկի համար՝ 275 դրամ, պղպեղի համար՝ 400 դրամ, իսկ արտահանված ծաղկի յուրաքանչյուր հատի համար՝ 37 դրամ։
Այս որոշումը կայացվել է արտահանողների հետ քննարկումների արդյունքում, որոնց ընթացքում բիզնեսի ներկայացուցիչները հայտնել են, որ նոր երկրներում մրցունակ լինելու համար ֆինանսական աջակցության հրատապ անհրաժեշտություն ունեն:
Առևտրային հոսքերի հրատապ վերաուղղորդման անհրաժեշտությունը պայմանավորված է ռուսական շուկայից ոլորտի ունեցած մեծ կախվածությամբ և վերջին օրերին ՌԴ վերահսկող մարմինների կողմից Հայաստանի նկատմամբ սահմանված առևտրային սահմանափակումներով: 2025 թվականին Հայաստանից թարմ պտուղբանջարեղենի և ծաղիկների արտահանման ընդհանուր ծավալը կազմել է շուրջ 73 միլիարդ դրամ, ընդ որում՝ այդ հոսքերի ավելի քան 93 տոկոսը բաժին է ընկել Ռուսաստանի Դաշնությանը։
Ըստ կանխատեսումների՝ հունիսին աջակցության ենթակա ծավալները կկազմեն մոտ 4250 տոննա պտուղբանջարեղեն և 10 միլիոն հատ ծաղիկ։ Պետական փոխհատուցումից օգտվելու համար տնտեսավարողները պետք է համապատասխան դիմում ներկայացնեն Էկոնոմիկայի նախարարություն՝ պարտադիր կցելով տարանցման հայտարարագիրն ու հաշիվ-ապրանքագիրը։
Ռուսաստանում հունիսի 2-ից ուժի մեջ է մտնում Հայաստանից կորիզավոր պտուղների և խաղողի ներկրման ժամանակավոր արգելքը, հայտնել է «Ռոսսելխոզնադզոր»-ը։ Սահմանափակումների տակ են հայտնվել բալը, կեռասը, ծիրանը, սալորը, դեղձը, նեկտարինը և թարմ խաղողը՝ իբրև թե «մատակարարումների ժամանակ հաճախակիացած խախտումների» պատճառով։ Սա վերջին շաբաթներին հայկական արտահանման դեմ Ռուսաստանում սահմանված առաջին արգելող միջոցը չէ։ Ավելի վաղ «Ռոսսելխոզնադզոր»-ն արգելել էր Հայաստանից ձկան և ձկնամթերքի ներկրումը՝ բացառություն անելով միայն ռուսական տեսչական ստուգումն անցած երկու ձեռնարկությունների համար։ Բացի այդ, Ռուսաստանը սահմանափակել է հայկական ծաղիկների, հանքային ջրի, կոնյակի, գինու, բանջարեղենի և ելակի ներկրումը։
Ռուսաստանի ղեկավարությունն ավելի վաղ բացահայտորեն մատնանշել էր Բրյուսելի և Եվրասիական տնտեսական միության (ԵԱՏՄ) միջև ընտրություն կատարելու անհրաժեշտությունը՝ ընդգծելով, որ եվրոպական կառույցների հետ մերձեցումն անխուսափելիորեն համակարգային բարդություններ կստեղծի հանրապետության համար եվրասիական տարածքում։
Իրավիճակն ակնառու կերպով սրվեց մայիսի վերջին Աստանայում կայացած ԵԱՏՄ գագաթնաժողովում, որտեղ միավորման գործընկերները՝ Ռուսաստանը, Բելառուսը, Ղրղզստանը և Ղազախստանը, հանդես եկան համատեղ հայտարարությամբ՝ կոչ անելով Երևանին հնարավորինս սեղմ վերջնաժամկետներում անցկացնել համազգային հանրաքվե՝ արտաքին քաղաքական վեկտորը վերջնականապես կողմնորոշելու համար։
Ավելին, միության անդամները նախաձեռնել են հատուկ զեկույցի պատրաստում՝ Հայաստանի անդամակցության հնարավոր կասեցման հետևանքների վերաբերյալ, որը նախատեսվում է ներկայացնել Բարձրագույն եվրասիական տնտեսական խորհրդի դեկտեմբերյան նիստին։ Չնայած աճող դիվանագիտական ճնշմանը՝ Նիկոլ Փաշինյանը վերահաստատել է Երևանի մտադրությունը՝ շարունակելու պլանավորված ու հանգիստ փոխգործակցությունը ԵԱՏՄ շրջանակներում այնքան ժամանակ, քանի դեռ երկու տնտեսական բլոկների միջև աշխարհաքաղաքական ընտրությունը չի դարձել լիովին անխուսափելի:
Verelq.am
