Հայաստանը Համաշխարհային բանկից ևս մեկ վարկ կներգրավի պետական բյուջեն համալրելու համար։ Այս անգամ գումարի չափը կկազմի 170,3 միլիոն եվրո (մոտ 200 միլիոն դոլար)։ Համապատասխան համաձայնագրի նախագիծը հավանության է արժանացել Հայաստանի կառավարության մայիսի 27-ի նիստում։
Վարկն ուղղվելու է կառուցվածքային բարեփոխումներին, որոնք մշակվել են Կառավարության կողմից՝ տնտեսության առողջացման նպատակով։ Նմանատիպ պրակտիկա կիրառվում է նաև միջազգային այլ ֆինանսական կազմակերպություններից բյուջետային վարկեր ստանալիս։
Մասնավորապես, նախատեսվում է կատարելագործել տնտեսական մրցակցության ոլորտի օրենսդրությունը և ընդունել «Ներդրումների մասին» օրենքի նոր խմբագրությունը, որը ընդլայնված իրավական երաշխիքներ կնախատեսի ներդրողների համար։
Բացի այդ, կընդլայնվեն Հայաստանի տնտեսական մրցակցության և սպառողների իրավունքների պաշտպանության հանձնաժողովի լիազորությունները՝ գնային համաձայնությունների և հակամրցակցային այլ գործողությունների կանխման մասով։
Բարեփոխումների առանձին ուղղություն է դառնալու «կանաչ» տնտեսության ոլորտում իրավական բազայի զարգացումը։ Բիզնեսի համար, մասնավորապես, կսահմանվեն ջերմոցային գազերի արտանետումների քվոտաներ։
News.am
