Մարիա Կարապետյանը մեղադրել է Նաիրա Զոհրաբյանին ստախոսության մեջ

Ես ոչ մի ելույթ չեմ դասավորել ոչ մեկի համար. տիկին Նաիրա Զոհրաբյանը ստում է: Այս մասին, այսօր՝ ապրիլի 8-ին, ԱԺ արտահերթ նիստում հայտարարեց «Իմ քայլը» խմբակցության պատգամավոր Մարիա Կարապետյանն՝ անդրադառնալով ապրիլի 5-ին ԱԺ-ում Մարդու իրավունքների պաշտպանության և հանրային հարցերի մշտական հանձնաժողովի կազմակերպած խորհրդարանական լսումների ժամանակ տրանսգենդերի մասնակցությամբ տեղի ունեցած միջադեպին և դրանից հետո ԲՀԿ-ական պատգամավոր Նաիրա Զոհրաբյանի հայտարարություններին և ակնարկներին, որ Մարիա Կարապետյանն է ԱԺ բերել այդ անձնավորությանը:

Նա նկատեց, որ լսումները բաց են եղել տիկին Նաիրա Զոհրաբյանի ղեկավարած հանձնաժողովի քարտուղարության հեռախոսահամարով գրանցված բոլոր ՀԿ-ների համար.

«Ես ոչ մի ելույթ չեմ դասավորել ոչ մեկի համար: Տիկին Նաիրա Զոհրաբյանը ստում է, թե մեր հանձաժողովը հստակ թեմաներ է սահմանել լսումների օրակարգի համար: Մարտի 11-ին հանձնաժողովի նիստին հաստատվել է մի օրակարգ, որտեղ թեմաներ, իհարկե, չկան: Առանց թեմաների լսումների օրակարգը տեղադրվել է ԱԺ կայքում: Լսումներից օրեր առաջ օրակարգն ԱԺ կայքից անհետացավ: Լսումներից օրեր առաջ հանձնաժողովների անդամներին ուղարկվեց նոր օրակարգ, որտեղ հայտնվել էին թեմաներ՝ առանց հանձնաժողովի անդամների հաստատման: Կայքը չթարմացվեց նոր թեմատիկ օրակարգով»,-ընդգծեց պատգամավորը:

Նա տեղեկացրեց, որ երբ ստացել է թեմաներով օրակարգը, այցելել է հանձնաժողովի քարտուղարություն, և հորդորել լսումների համար գրանցված բոլոր ՀԿ-ներին ուղարկել փոխված թեմատիկ օրակարգը, ինչը չի արվել:

«Տիկին Զոհրաբյանը ստում է, թե ՀԿ-ներին հորդորվել է գրանցվել միայն այն պարագայում, եթե իրենք օրակարգի թեմաներին առնչվող ելույթներ պետք է ունենան: Սա սուտ է, քանի որ, ինչպես ասացի, գրանցման պահին թեմաներ պարզապես չկային: ՀԿ-ների ներկայացուցիչները թեմատիկ օրակարգը տեսել են ԱԺ դահլիճում: Ավելին, տիկին Զոհրաբյանի գլխավորած հանձնաժողովի քարտուղարությունը գրանցված ՀԿ-ների ցուցակը հրաժարվել է տալ ինձ, մինչև գրանցման վեջնաժամկետը չավարտվի»:

Կարապետյանի խոսքով՝ ինքը միայն մեկ ելույթ էր ծրագրել՝ իրենը, և Զոհրաբյանին խնդրել էր եզրափակիչ ելույթի հնարավորություն տրամադրել իրեն. «Քանի որ նա չգիտի առերեսվել ճգնաժամային իրադրությունների հետ և կորցնում է ինքնատիրապետումը, նա այդ ելույթը չտրամադրեց: Ես այդ ելույթը կունենամ հաջորդ նախագծի քննարկման ժամանակ»:

Նշենք, որ մարդու իրավունքներին նվիրված լսումների ժամանակ ԱԺ ամբիոնից ելույթ ունեցավ տրանսգենդեր, որից հետո լսումները վարող Նաիրա Զոհրաբյանը հունից դուրս եկավ ու դուրս հրավիրեց նրան: