Աշխարհը կարող է հայտնվել մասշտաբային հումանիտար ճգնաժամից ընդամենը մի քանի շաբաթ անց՝Հորմուզի նեղուցով պարարտանյութերի տեղափոխման սահմանափակումների պատճառով: Ֆրանսպրես գործակալությանը տված հարցազրույցում դրա մասին հայտնել է ՄԱԿ-ի՝ սպառնացող աղետը կանխելու համար ստեղծված հատուկ նպատակային խումբը:
«Մենք մի քանի շաբաթ ունենք՝ կանխելու համար այն, ինչը, հավանաբար, կդառնա մասշտաբային հումանիտար ճգնաժամ»,- հայտարարել է ՄԱԿ-ի Նախագծերի սպասարկման գրասենյակի (UNOPS) տնօրեն և այդ աշխատանքային խմբի ղեկավար Խորխե Մորեյրա դա Սիլվան:
Նա զգուշացրել է, որ ընթացիկ իրավիճակի պահպանման դեպքում աշխարհը կարող է բախվել նրան, որ ևս 45 միլիոն մարդ կհայտնվի սովի և թերսնման վտանգի տակ: Ըստ նրա՝ Հորմուզի նեղուցով պարարտանյութերի մատակարարման խափանումները կարող են լուրջ հետևանքներ ունենալ համաշխարհային պարենային անվտանգության համար, քանի որ պարարտանյութերն ուղղակիորեն ազդում են շատ երկրների գյուղատնտեսության բերքատվության վրա:
ՄԱԿ-ն իրավիճակը դիտարկում է որպես ծայրահեղ հրատապ և պարենային ճգնաժամի հետագա էսկալացիան կանխելու համար անհապաղ միջոցառումներ պահանջող:
News.am
