Դավիթ Բաբայան. Ստեփանակերտի օդանավակայանը, հնարավոր է, այս տարի սկսի գործել
Ռուսաստանի, Հայաստանի և Ադրբեջանի ղեկավարների ստորագրած հայտարարությամբ նախատեսվող տրանսպորտային հաղորդակցության ուղիների ապաշրջափակման պարագայում քննարկման պետք է դրվի նաև Ստեփանակերտի օդանավակայանի վերաբացումը:
Արցախի Հանրապետության նախագահի խորհրդական Դավիթ Բաբայանն Aysor.am-ի հետ զրույցում ասաց, որ օդանավակայանը կլինի ոչ միայն ռազմական, այլև՝ քաղաքացիական նշանակության։
«Այն պետք է ծառայի որպես տրանսպորտային հանգույց ապաշրջափակման, հաղորդակցության վերաբացման կարևոր օբյեկտներից մեկը», - նշեց Բաբայանը։
Նա ասաց, թե պետք է այնպես անել, որ Արցախը վերականգնվի, իսկ այս տեսակետից չափազանց կարևոր է օդանավակայանի առկայությունը։
«Հետևաբար, մենք ակնկալում ենք, որ օդանավակայանը շուտով կվերաշահագործվի ու կծառայի մեր ժողովրդին», - ասաց Բաբայանը։
Արցախի նախագահի խորհրդականն ընդգծեց՝ կարծում է, այս տարում էլ կարող է օդանավակայանը շահագործվել։
«Կտեսնենք», - նշեց Դավիթ Բաբայանը։
Օդանավակայանը պատերազմի օրերին թիրախավորվել է հակառակարդի կողմից, սակայն, Բաբայանի խոսքով, լուրջ վնասներ չկան, որ անհնարին լինի շահագործումը։
«Շատ օպերատիվ ձևով հնարավոր է շահագործել», - հավելեց Դավիթ Բաբայանը։