Փաշինյանի հրաժարականի պահանջին միացել են նաև Ախուրյան, Հովտաշեն, Մարմաշեն համայնքները
Վարչապետ Նիկոլ Փաշինյանի հրաժարականի պահանջին միացել են նաև Ախուրյան, Հովտաշեն, Մարմաշեն համայնքները։ Այս մասին հայտնում է ՀՅԴ «Շիրակ» մարզային կոմիտեն։
«Հայաստանի Հանրապետության Շիրակի մարզի Ազատան, Բենիամին, Ախուրյան, Հովտաշեն, Մարմաշեն համայնքների ղեկավարներն ու համայնքապետարանների աշխատակազմերը, Մարմաշեն համայնքի ավագանու անդամների և վարչական ղեկավարների գերակշիռ մեծամասնությունը միացել են հանրապետության բազմաթիվ համայնքներին և պահանջում են Հայաստանի ապազգային և ապաշնորհ իշխանությունների՝ վարչապետի և կառավարության անհապաղ հրաժարականն ու անցնցում հեռացումը։
Կոչ ենք անում մարզի բոլոր համայնքների ղեկավարներին և ավագանիների անդամներին՝ ժամ առաջ միանալ հրաժարականի պահանջին և փրկել Հայաստանի ու հայ ժողովրդի պատիվն ու արժանապատվությունը»։
Նշենք, որ Նիկոլ Փաշինյանի հրաժարականն են պահանջել Արարատի մարզի մի շարք գյուղերի և քաղաքների ղեկավարներ:
Մասնավորապես, Փաշինյանի հրաժարականն են պահանջել Արարատի քաղաքապետ Հայկ Հայկյանը, Արմաշի գյուղապետ Հակոբ Զեյնալյանը, Սուրենավանի գյուղապետ Կարո Կարապետյանը, Արարատի գյւողապետ Կարեն Ղազարյանը, Լուսառատի գյուղապետ Դանիել Հակոբյանը, Եղեգնավանի գյուղապետ Հովսեփ Ղազարյանը, Նոյակերտի գյուղապետ Գագիկ Հարությունյանը, Վանաշենի գյուղապետ Արտակ Գրիգորյան, Ուրցաձորի գյուղապետ Ռաֆիկ Անդրեասյանը, Փոքր Վեդիի գյուղապետ Նորիկ Մարտիրոսյանը, Վեդիի քաղաքապետ Վարուժան Բարսեղյանը։
Նշենք, որ նույն կոչով հանդես են եկել նաև Կոտայքի մարզի Աբովյան, Չարենցավան քաղաքի քաղաքապետն ու ավագանին և Քասախ համայնքի ղեկավարն ու ավագանին:
Հրաժարականի կոչ են արել նաև Սյունիքի մարզի բոլոր համայնքների ղեկավարներն ու ավագանու անդամները, տեղեկացնում է News.am-ը:
