ԼՂՀ-ից փախստականները բողոքում են, որ չեն կարողանում պետօգնության ծրագրով գումար ստանալ
Մարդիկ բողոքում են, որ իրենք մինչ օրս չեն կարողանում ՀՀ կառավարության նախաձեռնած պետական աջակցության ծրագրով միջոցներ ստանալ: Այս մասին լրագրողների հետ հանդիպման ժամանակ ասաց Շուշիի նախկին քաղաքապետ Արծվիկ Սարգսյանը:
Որպես ևս մեկ խնդիր Սարգսյանը նշեց աջակցության ծրագրերի ևս մեկ պայման, ըստ որի՝ մարդը կարող է օգնություն ստանալ, եթե առնվազն 3 ամիս ապրել է ներկայումս Ադրբեջանի հսկողության տակ անցած տարածքներում:
«Ինչպե՞ս պարզել՝ նրանք ապրել են 3 ամիս, թե՞ 10 օր քիչ: Խնդիրներ են առաջանում»,-ասաց նախկին քաղաքապետը:
Սարգսյանը նաև բարձրացրեց Ղարաբաղում մարդկանց չհամակարգված աջակցության տրամադրման հարցը: Այսպես, նրա խոսքով, Ստեփանակերտում ուտելիք են բաժանում, սակայն համակարգման բացակայության պատճառով դեպքեր են առաջանում, երբ մարդը մի քանի անգամ գնում է տարբեր տեղեր և օգտվում, իսկ մյուսը նման հնարավորություն չունի կամ էլ չգիտի նման տեսակի աջակցության մասին:
Նրա խոսքով՝ այդ հարցը ևս պետք է լուծվի պետական մակարդակով:
Նա նաև հայտնեց, որ համաձայն ստացվող զանգերի՝ Ղարաբաղի որոշ բնակիչներ, որոնք բնակվում են Հայաստանում, ժամանակ է տրվում, որպեսզի նրանք ազատեն իրենց զբաղեցրած բնակարանները կամ հյուրանոցները, որտեղ նրանց տեղավորել էին, տեղեկացնում է News.am-ը:
