Լրագրողը Փաշինյանի խոսքի մեջբերմամբ պաստառ է բերել կառավարության մոտ
Կառավարության դիմաց «Yerkir.am»-ի լրագրող Լիա Սարսգսյանը ներկայացրել է Նիկոլ Փաշինյանի՝ ԱԺ-ում ելույթից Շուշիի մասին հայտարարությունը՝ պաստառի տեսքով, քանի որ Եռաբլուրում լրագրողի հարցին ի պատասխան Նիկոլ Փաշինյանը պահանջել էր գրավոր մեջբերել իր խոսքը, և ինքը կպատասխանի այդ հարցին ուղիղ եթերում:
«Ահա, ինչպես տեսնում եք, այստեղ գրված է վարչապետի խոսքը Շուշիի մասին, այստեղ հստակ գրված է, որ վարչապետը հարցադրում է անում, որ 90 և ավել տոկոսով ադրբեջանցիներով բնակեցված Շուշի քաղաքը հայկակա՞ն է: Այսինքն վարչապետը կասկածի տակ է դնում Շուշիի հայկական լինելու հանգամանքը: Հետևաբար, խնդրում եմ, պարոն վարչապետ, ներքևում հարցադրում կա, և խնդրում եմ՝ վարչապետն իջնի և ուղիղ եթերում պատասխանի՝ Շուշին հայկական է, թե ադրբեջանական»,-ասաց լրագրողը, տեղեկացնում է News.am-ը:
Հիշեցնենք, որ Հայաստանի Հանրապետության ԶՈՒ կազմավորման տոնին Եռաբլուրում, ի պատասխան լրագրողներից մեկի պնդմանը, թե դուք ասել եք, որ Շուշին ադրբեջանական քաղաք է, Նիկոլ Փաշինյանը հակադարձել էր. «Իմ մեջբերումը թղթի վրա կբերեք Դուք անձամբ, որ ես ասել եմ, թե Շուշին ադրբեջանական է և ուղիղ եթերում ես Ձեզ կպատասխանեմ»:
