Անն Լինդեի մեսիջը Ադրբեջանի իշխանությանը

Տարածաշրջանի իրավիճակը քննարկման կենտրոնում է: Այդ իրավիճակը փոխվել է նոյեմբերի 10-ից հետո: Այս մասին Երևանում ճեպազրույցի ժամանակ ասաց ԵԱՀԿ գործող նախագահ, Շվեդիայի արտգործնախարար Անն Լինդեն:

Նա ողջունեց Լեռնային Ղարաբաղի հակամարտության գոտում հրադադարի ռեժիմի սահմանումը և խորին ափսոսանք հայտնեց մարդկանց մահվան և վիրավորման դեպքերի առնչությամբ: Նրա խոսքով՝ հայտարարության իրականացումը հնարավորություն կտա առաջ շարժվել հակամարտության կարգավորման գործընթացում:

Որպես ԵԱՀԿ գործող նախագահ նա շեշտեց Մինսկի խմբի և ԵԱՀԿ անձնական ներկայացուցչի կարևոր աշխատանքը երկարաժամկետ և տևական խաղաղության որոնման գործում: Միևնույն ժամանակ, Լինդեն հայտարարեց, որ չլուծված հարցեր են մնում:

«ԵԱՀԿ-ն կարևոր դեր է խաղում առաջընթացի որոնման գործում: Այս փուլում կարևոր է հումանիտար և մարդու իրավունքների նկատմամբ հարգանքը: Անհրաժեշտ է վստահության մթնոլորտ և տեղում հասանելիություն ստեղծել»,-շեշտեց նախարարը՝ նշելով նաև կանանց դերը:

Նշենք, որ Անն Լինդեի մեսիջը հասցեագրված է Ադրբեջանի իշխանությանը: Բաքուն հրաժարվում է վերադարձնել հայ ռազմագերիներին և քաղաքացիական անձանց, ինչպես նաև խոչընդոտում միջազգային կազմակերպությունների, մասնավորապես՝ ՅՈՒՆԵՍԿՕ-ի հասանելիությունն իր վերահսկողության տակ գտնվող տարածքներ, տեղեկացնում է News.am-ը: