Միջազգային լրագրողները վրդովմունքով ու զզվանքով են արձագանքել Ադրբեջանում «ավարային այգու» բացմանը

Միջազգային լրագրողները վրդովմունքով ու զզվանքով են արձագանքել Ադրբեջանում, այսպես կոչված, «ավարային այգու» բացմանը, որին մասնակցել է նախագահ Իլհամ Ալիևը: Հայ զինվորների սաղավարտների ֆոնին «համարձակ» քայլող Ադրբեջանի առաջնորդի դեմքի ինքնագոհ արտահայտությունը մեծամասնության մոտ Հիտլերի և Սադամ Հուսեյնի հետ ասոցիացիա է առաջացրել, տեղեկացնում է News.am:

«Սա խորապես նողկալի է և հիշեցնում է Բաղդադում «Հաղթանակի կամարի» հիմքում սաղավարտների հավաքածուն, որը, Սադամի պմդմամբ, պատկանում է 1980-88 թվականների պատերազմում զոհված իրանցի զինվորներին»,- գրել է Bloomberg-ի լրագրող Բոբի Գոշը:

«Ես համարյա դադարել եմ Twitter-ում մեկնաբանել Հայաստան-Ադրբեջան թեման (երկու կողմերից չափազանց շատ են լինչի դատաստանի կողմնակիցները), բայց դա իսկապես հուսահատեցնող է: Կրակոցները դադարել են, բայց «հաղթանակի մտածողությունը = մյուսի նվաստացմանը» շարունակում է ապրել»,- ասել է Թոմաս դե Վաալը:

«Զարմանալի չէ, որ այդքան շատ ադրբեջանցի զինվորներ փաստել են իրենց դաժան ռազմական հանցագործությունները: Այլասերվածության այս տեսակը խրախուսվում և նշվում է պետական մակարդակով»,- ասել է հետաքննող լրագրող Լինդսի Սնելը:

The Times-ի և The Sunday Times-ի սյունակագիր Ալեքս Մասին այս կապակցությամբ մեջբերել է Ջոն Բյուքենին. «Դուք կարծում եք, թե պատը նույնքան ամուր, որքան հողը բաժանում է քաղաքակրթությունը բարբարոսությունից։ Ես ասում եմ ձեզ, որ բաժանումը թել է: Հպում այստեղ, մղում այնտեղ, և դուք հետ եք բերում Սատուրնի տիրապետությունը»:

«Սա խելահեղություն է»,- գրում է BuzzFeedNews-ի թղթակից Քրիստոֆեր Միլլերը:

«Ահա թե ինչ տեսք ունեն ոչ թե հաղթողները, այլ ռազմական հանցագործները. Ադրբեջանի նախագահ Ալիևը Բաքվում կառուցել է սեփական զվարճանքի այգին՝ հայ զինվորների սաղավարտներ, հայկական համազգեստով մոմե տիկնիկներ և խանութ... Սիրտս խառնում է»,- ասել է գերմանացի կինոռեժիսոր և իրավապաշտպան Դյունեզ Թեկկալը:

«Պատերազմի ավարտից հինգ ամիս անց Ալիևը դեռ զինվորական համազգեստ է կրում, մինչդեռ ադրբեջանցի պաշտոնյաները պնդում են, որ իրենք շատ են աշխատում հաշտեցման ուղղությամբ... Հիմնականում, սա օրինակ է, թե ինչու է հիմարություն կարծել, թե երբևէ հայ-ադրբեջանական հաշտեցումը հնարավոր է, քանի դեռ Ալիևն իշխանության գլուխ է...

Եվ, իհարկե, այն դառնում է էլ ավելի խելահեղ: Այստեղ Ալիևը ուսումնասիրում է հայ զինծառայողների մոմե կերպարները...»,- թվիթների շարքում գրել է Guardian-ի և CNN-ի լրագրող Նիլ Հաուերը: