Վիկտոր ՍՈՂՈՄՈՆՅԱՆ․ ՈՉ ՄԻ ԿԱՍԿԱԾ ՉՈՒՆԵՄ, ՈՐ ՆԱԽԱԳԱՀ ՔՈՉԱՐՅԱՆՆ ԱՐԴԱՐԱՑՎԵԼՈՒ Է
Ոչ մի կասկած չունեմ, որ այս գործով ևս նախագահ Քոչարյանն արդարացվելու է, քանի որ սա ևս օրինականության հետ որևէ առնչություն չունեցող գործ է։ Այս մասին Հ2-ի «Խոսքի իրավունք» հաղորդաշարին հայտարարել է երկրորդ նախագահ Ռոբերտ Քոչարյանի գրասենյակի ղեկավար Վիկտոր Սողոմոնյանը՝ անդրադառնալով Ռ․Քոչարյանի և նախկին փոխվարչապետ Արմեն Գևորգյանի՝ ենթադրյալ կաշառքի գործով դատավարությանը։
«Հիմա ավելի վստահ եմ ասում, որ սա ևս կարժանանա նախորդ գործի ճակատագրին, ինչպես բոլոր վատ սարքված և կարված գործերը։ Ամեն ինչ պարզ էր շատ վաղուց։ Ոմանք ասում են՝ ցավոք, գործը դատաքննության փուլ չհասավ, ես համաձայն չեմ, գործը դատաքննություն է անցել բոլորի աչքի առաջ, լրագրողների ներկայությամբ, եղել փորձագետների քննարկումների, հարցազրույցների թեմա, և մարդիկ հասկանում էին, որ գործը, որ կարվում նախագահ Քոչարյանի վրա որպես հանցագործություն՝ իրականության հետ ոչ մի կապ չունի։ Հիշեցնեմ, որ նախագահին հրավիրեցին որպես վկա, ապա մեղադրանք առաջադրեցին, հետո արագ-արագ կալանավորեցին, ներկայացրին, թե նա ինչ-որ առնչություն ունի սպանությունների հետ, հիշում եք նախագահ Քոչարյանի խոսքերը՝ կգամ, կգնամ բանտ, կապացուցեմ իմ անմեղությունը, ինչը և տեղի ունեցավ։ Հասարակության աչքի առաջ տեղի ունեցավ դատաքննություն և ի պատիվ նախագահի, իր թիմի, ապացուցվեց ճշմարտությունը և դատական վճռով նա արդարացված է։ Նախագահը հանգիստ խղճով կարող է նայել բոլոր քաղաքացիների աչքերին», ասել է Վ․Սողոմոնյանը։
13 տարի հասարակությանը թույն է ներարկվել, հնարավոր չէ՞ր այդ ամենի դեմն առնել ավելի շուտ՝ հարցին ի պատասխան, Վիկտոր Սողոմոնյանը պատասխանել է․ «թերևս, հնարավոր էր»։
«Երևի պետք էր այլ կարգի նպատակաուղղված աշխատանք տանել, բայց երբեք չես մտածում, որ այդ կարգի և այդ որակի ու մակարդակի սուտը կարող է դառնալ քրեական գործ, երկրորդը՝ երբ մեղավոր չես զգում քեզ, ուրեմն արդարանալու կարիք էլ չունես, բայց թերևս հնարավոր էր, պետք էր տարիներ առաջ սրա դեմն առնել։ Բայց տեսեք, այդ 13 տարվա թույն ասվածը չէր վերաբերում միայն Մարտի 1-ին, այս երեք տարվա ընթացքում, 18 թվի այսպես կոչված հեղափոխությունից հետո, նրա հանդեպ թշնամաբար տրամադրված այս իշխանությունը կարող էր բացահայտել այն բոլոր մեղադրանքները, որոնց մասին խոսում էր անընդհատ՝ առասպելական միլիարդներ, քաղաքական սպանություններ, նույն Մարտի 1-ը, բայց այդ ամենը տեղի չունեցավ։ Դուք գիտեք, որ միջոցների առաջ իշխանությունները կանգ չեն առել։ 20-ից ավելի երկիր նամակ ու պատվիրակություն է գնացել գտնելու համար այդ առասպելական միլիարդները։ Ոչինչ չեն գտել, քանի որ չկար ոչինչ։ Գիտեք, որ ամենաստահակ հանցագործի մոտ ինչ-որ պատգամավոր է գնացել, որպեսզի փորձի ինչ-որ ինֆորմացիա ստանալ, որը հնարավոր կլինի օգտագործել Հոկտեմբերի 27-ի գործով նախագահի դեմ։ Գիտեք, որ ոչ մի միջոցի առաջ չեն կանգնել՝ ընտանիքի անդամներին են կանչել հարցաքննության, փորձել հոգեբանական ճնշման ենթարկել, և ոչ ոք չի կարող ասել՝ այս երեք տարվա մեջ ծածկադմփոց արեցին։ Ոչ։ Թշնամաբար տրամադրված իշխանությունն արեց ամեն ինչ, որպեսզի այս մարդուն դարձնի մեղավոր և այդ բանը չստացվեց, և դա կարևոր էր նաև պատմության համար, որովհետև 100 տարի անց պատմության դասագրքերում կգրվեր, թե պետության ղեկավարն իբր հանցանքներ է կատարել», նշել է 2-րդ նախագահի գրասենյակի ղեկավարը։
Վիկտոր Սողոմոնյանի խոսքով՝ այս քրեական գործը կարելու համար դրան մասնակից բոլոր մարդիկ պետք է օրենքի առաջ պատասխան տան, թե որ հոդվածներով և ինչ ժամկետներում՝ դեռ հայտնի չէ։ Նա ասել է, որ օդում կախված մնում է հարցը և այդ մասին մամուլում հրապարակումներ եղել են, որ Սահմանադրական դատարանը արդար վճիռ է կայացրել կամ հրահանգ է ստացել, որպեսզի նույն հոդվածով ապագայում Փաշինյանը չդատվի, նաև հիշեցրել, որ բարձր դատարանն իր վճիռը կայացրել է ՄԻԵԴ-ի և Վենետիկի հանձնաժողովների կարծիքների հիման վրա, որոնք մամուլում հրապարակվել են, դրանցից ուղղակի բխում էր՝ չի կարելի վերացական հոդվածներով մարդուն մեղադրանք ներկայացրել, որոշակիության սկզբունքը, որ մարդն իր գործողություններն արել է, երբ այդ հոդվածը չի եղել։
«Բոլորս հիշում ենք, որ երբ ՍԴ-ն հայտարարեց, որ գնում է քննելու այս գործով դիմումը, հաջորդ օրը ձեռնարկվեց արշավ ՍԴ կազմը փոխելու ուղղությամբ, և նույնիսկ այս կազմը այսպիսի որոշում կայացրեց, և ժամանակը ցույց կտա՝ արդար վճիռ է կայացրել, թե հրահանգ կատարել», ասել է նա։
