Խզմալյան. Կարևոր է համաշխարհային հանրության տեղեկացվածությունը

Ղարաբաղյան երկրորդ պատերազմից հետո Ադրբեջանի կողմից գրավված տարածքներում հայկական հուշարձանների ոչնչացման գործընթացի վրա առավել շոշափելի ազդեցություն կարող է ունենալ համաշխարհային հանրության իրազեկումը և դրա համապատասխան դիրքորոշման ձևավորումը: Այս մասին ապրիլի 27-ին լրագրողների հետ հանդիպման ժամանակ ասաց Հայաստանի կրթության, գիտության, մշակույթի և սպորտի փոխնախարար Արա Խզմալյանը:

Նա պարզաբանեց, որ կարևոր է բարձրացնել միջազգային հանրության իրազեկվածությունն այս խնդրի վերաբերյալ: Ըստ նրա՝ չափազանց դժվար է խոսել օրենքի և բարոյականության լեզվով մի երկրի իշխանությունների հետ, որոնք այսպես կոչված «Հաղթանակի պուրակ» են բացում՝ սաղավարտներով և զոհված հայ զինվորների մանեկեններով:

«Նման պայմաններում փակուղին անխուսափելի է, իսկ երկխոսությունը ծայրաստիճան բարդ է, սակայն Հայաստանի իշխանություններն անում են հնարավոր ամեն ինչ: Թշնամին չի զսպվում իրավական, բարոյական կամ քաղաքակրթական նորմերով, նա անտարբեր է համամարդկային արժեքների նկատմամբ»,- ասաց պաշտոնյան, տեղեկացնում է News.am-ը: