Էդգար Ղազարյան․ Ո՞րը կլիներ Արա Այվազյանի ճիշտ քայլը
Իմ ընկալումներում Նիկոլ Փաշինյանը հայ ժողովրդի ամենամեծ թշնամին է, և Այվազյանը ծառայել է նրան` սպասարկելով թշնամու շահերը։ Sputnik Արմենիայի հետ զրույցում նման կարծիք հայտնեց ՍԴ աշխատակազմի նախկին ղեկավար Էդգար Ղազարյանը` անդրադառնալով ՀՀ ԱԳ նախարար Արա Այվազյանի հրաժարականի որոշմանը։
«Եթե ինչ-որ պահից նա որոշել է հրաժարական տալ, դա չի արդարացնում նրա գործողությունները և այն գործունեությունը, որն իրականացրել է մինչև այս պահը»,- ասաց նա։
Ղազարյանի խոսքով` հետպատերազմյան շրջանում ցանկացած խելամիտ դիվանագետ չպետք է համաձայներ ստանձնել Նիկոլ Փաշինյանի առաջարկած արտաքին գերատեսչության ղեկավարի պաշտոնը, այն դեպքում, երբ ակնհայտ էր, որ Փաշինյանը տապալել էր ԱԳ նախարարության համար գլխավոր առաջնահերթությունը` ԼՂ խնդրի լուծման բանակցային գործընթացը։
«Համաձայնել այդ մարդու հետ իրականացնել դիվանագիտական աշխատանք նշանակում է` ուղղակի մասնակցել թշնամու շահերի սպասարկմանը, ինչն արել է Այվազյանը։ Իմ կարծիքով` ճիշտը ոչ թե նրա հրաժարականն էր, այլ այն, որ նա հայտարարեր, որ չի ենթարկվելու Փաշինյանին»,- նշեց Ղազարյանը։
Նրա կարծիքով` Այվազյանը ոչ թե պետք է հրաժարվեր պաշտոնից, այլ հասներ նրան, որ ԱԳՆ բոլոր աշխատակիցները գործադուլ անեին` ի նշան բողոքի, որ չեն պատրաստվում կատարել վարչապետի պաշտոնակատարի հանձնարարականները։
«Նրանք պետք է ասեին, որ չեն պատրաստվում ծառայել Փաշինյանին։ Նույնը պետք է անեն բոլոր նախարարությունները, քանի իրենք դա չեն անում ` իրենց հեռանալով կարող է ուղղակի փորձեն անձնական որոշ խնդիրներ լուծել, որն ինձ համար ընդունելի չէ»,- հավելեց Ղազարյանը։