Վահե Գրիգորյանը կմասնակցի ընտրությունների արդյունքների վիճարկման հարցով ՍԴ նիստին

Սահմանադրական դատարանը հուլիսի 4–ի աշխատակարգային նիստում քննել և մերժել է հունիսի 20-ի ընտրությունների արդյունքների վիճարկման հարցով ՍԴ նիստին դատավոր Վահե Գրիգորյանին ինքնաբացարկ հայտնելու վերաբերյալ միջնորդությունը: Այս մասին News.am-ի հետ զրույցում ասաց ՍԴ մամուլի քարտուղար Եվա Թովմասյանը։

«Որպեսզի ՍԴ աշխատակարգային նիստում քննարկվեր դատավոր Վահե Գրիգորյանին ինքնաբացարկ հայտնելու միջնորդությունը, այն պետք է հայտներ ՍԴ դատավորներից մեկը, ինչն էլ տեղի է ունեցել, սակայն միջնորդությունը մերժվել է»,– ասաց Թովմասյանը՝ չնշելով, թե որ դատավորն է եղել միջնորդություն ներկայացնողը։

Նշենք, որ տեղեկություններ կան՝ ինքնաբացարկի միջնորդություն է հայտնել նաև Վահե Գրիգորյանը ՍԴ անդամ Հրայր Թովմասյանին։ ՍԴ մամուլի քարտուղարը ո՛չ հերքեց, ո՛չ էլ հաստատեց այս տեղեկությունը, ընդգծելով միայն, որ հուլիսի 4–ի աշխատակարգային նիստում քննվել և մերժվել են մեկից ավելի ներկայացված միջնորդություններ։

Հիշեցնենք, որ «Հայաստան» դաշինքը դիմել է Սահմանադրական դատարան (ՍԴ) Կենտրոնական ընտրական հանձնաժողովի (ԿԸՀ) 2021 թվականի հունիսի 27-ի որոշումն անվավեր ճանաչելու պահանջով։ Դաշինքը վիճարկում է ընտրության արդյունքների վերաբերյալ ընդունված որոշման սահմանադրականությունն ու օրինականությունը, ինչպես նաև որոշման հիմքում դրված փաստական տվյալները։