ՀՀ-ի և ՌԴ-ի միջև հնարավոր կլինի՞ միմյանց տարածք մուտք գործել առանց ՊՇՌ թեստ հանձնելու

Հայաստանն ու Ռուսաստանը բանակցում են, որպեսզի երկու երկրների քաղաքացիները պատվաստման մասին փաստաթղթի առկայության դեպքում անարգել մուտք գործեն միմյանց տարածքներ: Այս մասին News.am-ի գրավոր հարցմանն ի պատասխան հայտնել են Առողջապահության նախարարությունից:

Ներկայացնում ենք News.am-ի հարցումն ու դրա պատասխանը:

«Հարց. Արդյո՞ք իշխանությունն՝ ի դեմս առողջապահության նախարարության, մտադիր է բանակցություններ սկսել ռուսական կողմի հետ՝ երկու երկրների պատվաստված քաղաքացիների՝ պատվաստման մասին էլեկտրոնային կամ թղթային կրիչով սերտիֆիկատների հիման վրա ՌԴ և ՀՀ անխոչընդոտ մուտքի մասին համաձայնագրի հասնելու հետ կապված: Դա կազատի ՊՇՌ-թեստերի հավելյալ ծախսերից ինչպես զբոսաշրջիկներին, այնպես էլ աշխատանքային միգրանտներին, ինչպես նաև կնպաստի կորոնավիրուսի դեմ պատվաստման գործընթացի ճանաչելիությանը»:

Պատասխան. Ձեր հուլիսի 30-ի հարցման կապակցությամբ, հայտնում եմ, որ ձեր կողմից բարձրացված հարցի ուղղությամբ Հայաստանի Հանրապետության և Ռուսաստանի Դաշնության միջև բանակցություններն արդեն մեկնարկել են և ընթացքի մեջ են»: