Մերկելը հայտարարել է 40 հազար աֆղան փախստական ընդունելու պատրաստակամության մասին

Գերմանիան կընդունի ոչ միայն Բունդեսվերի և ԱԳՆ-ի աֆղանցի պաշտոնյաներին, այլև Աֆղանստանի այն քաղաքացիներին, ովքեր ապաստանի կարիք ունեն: Այս մասին հայտարարել է Գերմանիայի կանցլեր Անգելա Մերկելն Ավստրիայի իր գործընկեր Սեբաստիան Կուրցի հետ մամուլի ասուլիսի ժամանակ, փոխանցում է Spiegel-ը:

«Մենք միշտ ասել ենք, որ ցանկանում ենք ընդունել ոչ միայն Գերմանիայում աշխատող տեղացի աշխատակիցներին, այլև այն մարդկանց, ովքեր հատուկ կերպով ներգրավված էին Գերմանիայի հետ աշխատանքներում... Մենք բոլորս տեսանք պայմանները Քաբուլի օդանավակայանում... Ընդունվել են նաև մարդիկ, ովքեր ապաստանի կարիք ունեին»,- ասել է Մերկելը:

Նա հավելել է, որ Գերմանիան ակնկալում է աֆղանական տարածքից տարհանել մինչև 40 հազար մարդու: Ընդ որում, կանցլերը ուշադրություն է հրավիրել նրա վրա, որ մնում է պարզել, թե այս թվից քանիսն իրականում կցանկանա հեռանալ Աֆղանստանից: Ամեն ինչ կախված կլինի այն պայմաններից, որոնք զինյալները կստեղծեն երկրում, նշել է Գերմանիայի ղեկավարը, տեղեկացնում է News.am-ը: