«Ֆիզգորոդոկում» ապօրինի օտարված հողատարածքի վերաբերյալ քրեական գործ է հարուցվել

«Ֆիզգորոդոկում» ապօրինի օտարված հողատարածքի վերաբերյալ հարուցվել է քրեական գործ։ Այս մասին ասվում է «Ֆիզգորոդոկի» բնակիչների հայտարարության մեջ, տեղեկացնում է Sputnik Արմենիա-ն։

Նշվում է, որ բնակիչների հաղորդման հիման վրա օգոստոսի 30-ին դատախազությունը գործ է հարուցել է Քրեական օրենսգրքի 308-րդ հոդվածի 2-րդ մասի հատկանիշներով՝ պաշտոնատար անձի կողմից պաշտոնեական դիրքը չարաշահելու և դրա արդյունքում ծանր հետևանքների հանգեցնելու հիմքով։ Գործն ուղարկվել է ԵՔՔՎ Աջափնյակ և Դավթաշեն վարչական շրջանների քննչական բաժին։

Հաղորդագրությունում ասվում է, որ մի քանի օր է՝ Ալիխանյան 6/1 հասցեում շինարարական աշխատանքները կանգնեցված են։

«Մենք ակնկալում ենք, որ դատախազությունը կկասեցնի հնարավոր շինարարությունը մինչև գործի քննության ավարտը՝ քրեական գործի համար կարևոր ապացույցները անվնաս պահպանելու նպատակով», - նշվում է հայտարարության մեջ։

Բնակիչները նշում են, որ շարունակելու են իրավական պայքարը, զուգահեռաբար չեն դադարեցնելու քաղաքացիական նախաձեռնություններն ու խնդրի բարձրաձայնումը։

Երևանի քաղաքապետարանից նրանք պահանջում են

- Անհապաղ տրամադրել տարածքի՝ Հողային օրենսգրքի 60 հոդվածի սահմանափակումներին ենթակա լինելու հիմքերն ու եզրակացությունը։

- Հեռացնել շինհրապարակի ցանկապատը, որը տեղադրվել է մայթերին, ճանապարհին, հանրային տարածքում։

- Իրավապահ մարմիններին դիմել «Ռատկո» ՍՊԸ կառուցապատող կազմակերպությանը առանց հողօգտագործման թույլտվության համայնքային հողում ապօրինի աշխատանքներ իրականացնելու մասով պատասխանատվության ենթարկելու պահանջով։

- Ավագանու արտահերթ նիստ հրավիրել խնդիրը քննելու և քաղաքին պատկանող հողը վերադարձնելու քայլեր ձեռնարկելու համար՝ ապահովելով բնակիչների ներկայացուցիչների մասնակցությունը։