Արցախի անվտանգության և կարգավիճակի հարցերը լուծված չեն

Արցախի անվտանգության և կարգավիճակի հարցերը դեռևս լուծված չեն, և արցախյան կողմի բոլոր ակնկալիքները տարիներ առաջ հայտարարված սկզբունքների հիման վրա կարգավորմանն են ուղղված: Այս մասին News.am-ի հետ զրույցում հայտնեց Արցախի Հանրապետության նախագահի մամուլի քարտուղար Լուսինե Ավանեսյանը՝ անդրադառնալով նախագահ Արայիկ Հարությունյանի և ԵԱՀԿ Մինսկի խմբի ռուսաստանցի նորանշանակ համանախագահ Իգոր Խովաևի հանդիպմանը:

Ավանեսյանի դիտարկմամբ՝ հենց այս համատեքստում են ԵԱՀԿ Մինսկի խմբի համանախագահության ձևաչափից Արցախի իշխանությունների ակնկալիքները:

«Թեև շատ լավ գիտակցում ենք, որ ուժի և դրա սպառնալիքի չկիրառման սկզբունքն արդեն իսկ խախտվել է»,- միաժամանակ նկատեց Ավանեսյանը:

Արցախի նախագահի խոսնակը շեշտեց, որ կարգավիճակի վերջնական հստակեցման տեսանկյունից Արցախը չի կարող որևէ կարգավիճակով լինել Ադրբեջանի կազմում: