ՄՏԱԴԻՐ ԵՆ ԽՈՇՏԱՆԳԵԼ՝ ՍՊԱՆԵԼՈՒ ԱՍՏԻՃԱՆ

Կորոնավիրուսի բուժումը Հայաստանի չպատվաստված քաղաքացիների համար մոտ ապագայում դառնալու է վճարովի: Այս մասին հայտնել է առողջապահության նախարարի մամուլի քարտուղար Հռիփսիմե Խաչատրյանը, հաղորդում է Նովոստի-Արմենիան։ «Այս հարցն արդեն քննարկվում է նախարարությունում: Խոսքը բավականին թանկարժեք բուժման մասին է: Բուժումը քաղաքացիների համար կարժենա միջինում 800 հազար դրամ»,- ասված է հաղորդագրության մեջ։

ԲԱՅՑ ԱՆՀՆԱՐ Է ԼՌԵԼ. Հայաստանի կառավարությունը՝ ընդհանրապես, և առողջապահության համակարգը՝ մասնավորապես, դատելով ամենից, արդեն բացահայտորեն ներկայանում են որպես դահիճներ՝ կտտանքների սենյակում։ Խոշտանգում են հասարակությանը, իսկ բուն կտտանքները դառնում են գնալով ավելի այլասերված։ Ընդ որում կորոնավիրուսը ուժգնացրեց իշխանության դաժանությունը ժողովրդի հանդեպ. համենայն դեպս անցած տարվա մարտից սկսած համավարակի դեմ պայքարի ոլորտում կառավարության գրեթե բոլոր նախաձեռնությունները առավելագույնս ցավոտ են եղել մարդկանց համար, հակահամաճարակային նվազագույն արդյունավետությամբ հանդերձ։

Հիմա արդեն շատերը մոռացել են այն մասին, որ սկզբում, երբ երկրում բժշկական դիմակների դեֆիցիտ էր զգացվում, կառավարության ու առողջապահության նախարարության ներկայացուցիչները պնդում էին, թե դրանք (դիմակները) անօգուտ են վիրուսից պաշտպանվելու տեսանկյունից: Հետո, երբ երկիրը հեղեղեցին դիմակներով, իսկ տեղի օլիգարխները սկսեցին դրանց արտադրությունը, իշխանությունը սկսեց հարկադրել բնակչությանը դիմակներ կրել։ Իսկ հարկադրանքի հիմնական միջոց դարձավ տուգանքով պատժելը։ Այն մասին, թե ինչքան փող է պոկել կառավարությունը քաղաքացիներից՝ 10-հազարական դրամ տուգանքներով, պաշտոնյաները համեստորեն լռեցին։

Նշենք, որ սա այն կառավարությունն է, որն իշխանության եկավ «ժողովուրդը տուգանքի մատերիալ չէ» կարգախոսով։ Նշենք նաև, որ սա այն ժողովուրդն է, որի 30 տոկոսի կենսամակարդակը ցածր է աղքատության շեմից։ Եվ այդ ցուցանիշը շարունակ աճում է՝ հաշվի առնելով գների մշտական համատարած աճը։

Դիմակների էպոպեան ավարտվեց, և կառավարությունը սևեռեց ուշադրությունը պատվաստանյութերի ու տեստերի վրա: Եվ հորինեց բնակչության բացահայտ թալանի հերթական մեխանիզմը։ Այո, խոսքը ուժի մեջ մտած որոշման մասին է, ըստ որի՝ աշխատող բոլոր քաղաքացիները, ովքեր չեն ցանկանում պատվաստվել, պարտավոր են երկու շաբաթը մեկ վճարովի տեստավորել կորոնավիրուսի առկայությունը պարզելու համար։ Կրկին իսկ, չմոռանանք, որ երկրի բնակչության մեկ երրորդը չքավոր է։

Ասենք, սա համաքաղաքացիների վրա ֆինանսական ճնշման առումով կառավարության դաժանության բնավ միակ ցուցանիշը չէ։ Ներկայացնենք ևս մեկ թիվ. միջին աշխատավարձը երկրում կազմում է մոտ 200 հազար դրամ։ Տեստերն արժեն 8-10 հազար դրամ։ Այսինքն միջին հաշվարկով յուրաքանչյուր աշխատող չպատվաստված քաղաքացի պարտավոր է իր աշխատավարձի մոտավորապես 8-10%-ը տալ տեստավորող լաբորատորիաներին։ Այսօրվա դրությամբ պատվաստում է անցել շուրջ 300 հազար մարդ։ Աշխատողների թիվը ավելի քան 640 հազար է։ Այսինքն առնվազն 340 հազար քաղաքացի պարտավոր է վճարովի տեստավորվել։ Ըստ էության, կառավարությունը քաղաքացիների գրպանից կորզում է առնվազն 2,7 մլրդ դրամ, կրկնեմ, գների ահռելի աճի և բնակչության եկամուտների նվազման պայմաններում։

Այս ցուցանիշը է՛լ ավելի տպավորիչ է դիտվում մի քանի այլ ցուցանիշների խորապատկերին։ Այսպես, 2022 թվականի բյուջեի նախագծում նախատեսվում է 2 միլիարդով կրճատել «հանրային առողջության ապահովում» հոդվածի ծախսերը։ Դա փաստացի նշանակում է, որ գործող կառավարությունը մտադիր է հետագայում էլ շարունակել ֆինանսապես խոշտանգել երկրի բնակչությանը կտտանքների բժշկական սենյակում։ Իսկ եթե հաշվի առնենք, որ քննարկվում է կորոնավիրուսի վճարովի՝ 800 հազար դրամ արժողությամբ բուժում ներդնելու գաղափարը, ապա ակնհայտ է դառնում, որ սրանք պատրաստվում են խոշտանգել մարդկանց սպանելու աստիճան…