Մանե Գալոյանը 3 մրցանակի է արժանացել «Օպերալիա» միջազգային մրցույթում
Մոսկվայի Մեծ թատրոնում կայացած «Օպերալիա» միջազգային մրցույթում Հայաստանը ներկայացնող սոպրանո Մանե Գալոյանը արժանացել է միանգամից երեք մրցանակի։ Տեղեկությունը հայտնում է Արամ Խաչատրյանի տուն-թանգարանի մամուլի ծառայությունը։
Գալոյանը գրավել է երկրորդ տեղը, ճանաչվել է «Սարսուելայի լավագույն կատարող» և հանդիսատեսի համակրանքի համար արժանացել Rolex-ի մրցանակին։
Այս միջազգային մրցույթի հիմնադիրն է հայտնի տենոր Պլասիդո Դոմինգոն, որի նպատակն է բացահայտել երիտասարդ տաղանդներին։
Տեղեկացնենք, որ 28-ամյա Մանե Գալոյանը Երևանի Կոմիտասի անվան պետական կոնսերվատորիայի շրջանավարտ է, հանդես է եկել Սան Անտոնիոյի նվագախմբում, Օքսֆորդի Բալիոլ քոլեջում, Նյու Յորքի «Օպերա Ամերիկա երիտասարդ կատարողներ» համերգաշարում, Հյուսթոնի գեղարվեստի թանգարանում։
Համերգային կատարումներով հանդես է եկել նաև Հայաստանի ազգային կամերային նվագախմբի և Հայաստանի ազգային ֆիլհարմոնիկ նվագախմբի հետ, տեղեկացնում է Sputnik Արմենիա-ն։