ՀԱԷԿ-ում զգալի աշխատանք է իրականացվել ծերացման կառավարման բնագավառում

Հոկտեմբերի 26-ից 29-ը Հայկական ատոմային էլեկտրակայանում Ատոմային էներգիայի միջազգային գործակալությունն անվտանգության համընդհանուր ստուգում է իրականացրել։ Տեղեկությունը հայտնում է ՀԱԷԿ–ը` հավելելով, որ ստուգվել են ատոմային էլեկտրակայանների շահագործման ժամկետի երկարացման ռազմավարությունն ու հիմնական փուլերը:

Հատկանշական է, որ առաքելությունն անցկացվեց այս տարի, երբ Հայկական ԱԷԿ-ում իրականացվեցին անվտանգության բարձրացմանն ուղղված արդիականացման աշխատանքներ, որի արդյունքում նախատեսվում է էներգաբլոկի նախագծային շահագործման ժամկետը երկարացնել մինչև 2026 թվականը:

Նշվում է, որ քառօրյա այցի ընթացքում փորձագետների խումբն իրականացրել է ստուգումներ՝ հաշվի առնելով շահագործման ժամկետի երկարացման հետ կապված ծրագրերի կազմակերպումն ու դրանց համապատասխանությունը ԱԷՄԳ-ի անվտանգության ստանդարտներին։

«Փորձագետները փաստեցին, որ հիմնվելով նախորդ՝ 2018 թվականի առաքելության արդյունքների և եզրակացությունների վրա՝ ՀԱԷԿ-ում զգալի աշխատանք է իրականացվել ծերացման կառավարման բնագավառում»,–նշված է հաղորդագրության մեջ։

Փորձագետների թիմը նախնական հաշվետվություն է ներկայացրել ատոմակայանի ղեկավարությանը և ՀՀ կարգավորող մարմնին. այն ենթակա է վերանայման: Հնարավոր փոփոխություններից, առաջարկություններից և հիմնավորումներից հետո փաստաթղթի վերջնական տարբերակը 3 ամսվա ընթացքում կներկայացվի ՀԱԷԿ-ին, ՀՀ ՄԱԿ կոմիտեին և կառավարությանը, տեղեկացնում է Sputnik Արմենիա-ն: