«ՊԱՇԸ» ԿԽԼԻ՞ ԱԲՈՎՅԱՆԸ ԾԱՌՈՒԿՅԱՆԻՑ
Գլխապտույտ կարիերայի վախճանը
Ուղիղ մեկ ամիս առաջ Կոտայքի նախկին մարզպետ, այժմ բնապահպանության նախարար Ռոմանոս Պետրոսյանն այցելեց Աբովյան և հանդիպում ունեցավ «Քաղաքացիական պայմանագիր» կուսակցության տեղի ստորաբաժանման հետ: Հանդիպման արդյունքներով «ԳԱ»-ն արդեն գրել է այն մասին, որ դեկտեմբերի 5-ին կայանալիք ՏԻՄ ընտրություններով Աբովյանում վերջ կտրվի Գագիկ Ծառուկյանի ազդեցությանը, որը տարիներ շարունակ համարվել է Կոտայքի մարզի և դրա մայրաքաղաքի բացարձակ տերն ու գրեթե ֆեոդալը։
Մեկ ամիս առաջ Պետրոսյանը իշխող ուժի տեղական բջջի հետ համաձայնեցրել է նախընտրական ցուցակի թիվ 1 հորիզոնականում իր թեկնածուի առաջադրումը. խոսքը «Հայանտառ» գրասենյակի ղեկավար (2020թ. սեպտեմբերից) Պավել Ցուգունյանի մասին է՝ «Պաշ» մականունով: Մինչ այդ նա զբաղեցրել է Կոտայքի մարզպետի օգնականի պաշտոնը և ղեկավարել մարզի ջրամատակարարման համակարգը։ Մինչև դեկտեմբերի 5-ը մենք դեռ առիթ կունենանք խոսելու Աբովյան համայնքում նախընտրական մրցավազքի ֆավորիտի (ֆավորիտների) մասին, իսկ այսօր խոսքը հեռացող քաղաքապետի մասին է։
Ի տարբերություն Կապանի գործող քաղաքապետ Գևորգ Փարսյանի, որը մասնակցելու է համայնքի ավագանու ընտրություններին, չնայած իշխող ռեժիմի կողմից հարուցվող բոլոր խոչընդոտներին, Աբովյանի քաղաքապետը որոշել է զիջել աթոռն առանց մարտի: Համեմատությունը բնավ պատահական չէ. համայնքի ղեկավարի պաշտոնում Փարսյանի լիազորությունների ժամկետը չի լրացել, իշխանությունն արտահերթ ընտրություններ սադրեց՝ հորդորելով ավագանու 8 անդամների հրաժարական տալ։ Գևորգյանի լիազորությունների երկրորդ ժամկետը նույնպես չի լրացել, սակայն նա որոշել է չառաջադրվել, այլ զիջել քաղաքապետի աթոռը նրան, ում կուսակցությունը ձայների մեծամասնություն կհավաքի դեկտեմբերի 5-ին:
Մոտեցումների տարբերությունը բացատրվում է նրանով, որ անկուսակցական Փարսյանը ինքնուրույն կերպար է, թեև ունի քաղաքական նախապատվություններ (հունիսի 20-ի ընտրություններում նա աջակցել է «Հայաստան» դաշինքին), իսկ Գևորգյանը ԲՀԿ-ական է և լիովին կախված է Գագիկ Ծառուկյանի կամքից ու տրամադրությունից։ Գևորգյանն իր կարիերան սկսել է խորհրդարանի աշխատակազմում, որտեղ թղթեր էր տանում-բերում, մինչև որ նրան նկատեց ԲՀԿ առաջնորդը։ Գագիկ Նիկոլայիչին դուր եկավ պատրաստակամ ու աշխատասեր երիտասարդը, և նա որոշեց դարձնել նրան Աբովյանի քաղաքապետ։
Դա նախկին իշխանության օրոք էր, երբ երիտասարդ, կիրթ և, ամենակարևորը, հնազանդ ու ճշտակատար կարիերիստների պահանջարկ կար։ Գևորգյանը գլխապտույտ կարիերա արեց՝ ԱԺ աշխատակազմից մեկ քայլով հասնելով քաղաքապետի աթոռին։ Նախկին իշխանությունը Ծառուկյանին չէր խանգարում իր կարգերը հաստատել մարզում, սակայն իշխանափոխությունից հետո էլ Գևորգյանը 2019-ին կրկին առաջադրվեց քաղաքապետի պաշտոնում ու կրկին հաղթեց։
Նախ՝ այն պատճառով, որ Ծառուկյանն աջակցել էր Փաշինյանին հեղափոխության ցուցանակի տակ իշխանության հակասահմանադրական զավթման արշալույսին։ Երկրորդ՝ նոր իշխանության ներկայացուցիչներն Աբովյանում համաձայնության չէին եկել «Իմ քայլը» դաշինքի թեկնածուի հարցում, ուստի հաղթող դարձավ կրկին Գևորգյանը։
Փաշինյանի հրաժարականի պահանջը հանված է ԲՀԿ օրակարգից
Քաղաքապետի պաշտոնում նրա լիազորությունների ժամկետը չի լրացել, բայց Գևորգյանը տեղեկացրել է իր բոսին, որ չի ցանկանում առաջադրվել երրորդ անգամ։ ԱԺ արտահերթ ընտրություններում պարտվելուց հետո ԲՀԿ-ն հայտնվել է քաղաքական գործընթացների մայթեզրին, չնայած այն հանգամանքին, որ ընտրություններից հետո Ծառուկյանը հանդիպեց Փաշինյանի հետ ու սեղմեց նրա ձեռքը։ Այդ ժամանակից ի վեր ԲՀԿ առաջնորդի մասին խոսում են որպես վարչապետի կողմից ղեկավարվող ոչ պաշտոնական արտախորհրդարանական կոալիցիայի մշտական անդամի։ Փաշինյանի հրաժարականի պահանջն, ըստ էության, հանված է ԲՀԿ օրակարգից։
Այսօր այդ խմբակցության նախկին պատգամավորներ Միքայել Մելքումյանը, Արման Աբովյանը և Շաքե Իսայանը հաղորդումներ են վարում Ծառուկյանի հեռուստաալիքով, որի վերլուծական ծրագրերի տոնայնությունը շատ հեռու է ռեժիմին հասցեագրած քննադատությունից, իսկ ընտրություններին մասնակցելուց Գևորգյանի հրաժարումը, ամենայն հավանականությամբ, թելադրված է հենց Ծառուկյանի կողմից։ Դատելով ամենից, Գագիկ Նիկոլայիչին ակնարկել են, որ վատ չէր լինի ազատել քաղաքապետի աթոռը «Քաղաքացիական պայմանագրի» թեկնածուի համար։
Գործող քաղաքականության ոլորտում հլու-հնազանդ տղաներին փոխարինելու են եկել Փաշինյանի «ուսապարկերը»։ Սա այն սերնդի շարունակությունն է, որը ծնունդ է առել ողջ ժողովրդին հայտնի «ՀՀՇ-ական շվաբրերից»։ Ներկայիս երիտասարդ կարիերիստները գերազանց գիտեն յուղոտ պաշտոնի ու ղեկավար դիրքի հասնելու ուղիները։ Ի տարբերություն նախորդ սերնդի, սրանք թերուս են, բայց համառ և լավ գիտեն, թե ինչ է իրենց ուզածը կյանքից: Գևորգյանը Ծառուկյանի համար նույնն էր, ինչ այսօր «Կոկորդիլոս» մականունով Գարիկ Սարգսյանը, Արգիշտի Քյարամյանը, Բագրատ Բադալյանը՝ Փաշինյանի համար։ Ֆավորիտիզմը կադրային քաղաքականության հետ մեկտեղ ծաղկում է տոհմացեղային սկզբունքով։
Մեծ հաշվով քիչ բան է փոխվել։ Դատելով «ուսապարկերի» քանակից ու որակից՝ այսօր, ինչպեսև նախկինում, բավական է դուր գալ «թափով հոպարին», որը քեզ խորհրդարան կանցկացնի կամ կնշանակի քաղաքապետ։
Աբովյանում ընտրությունների ելքի վերաբերյալ ոչ մի կասկած չկա. ռեժիմը որոշել է Ծառուկյանից խլել Կոտայքի մարզն իր մայրաքաղաքով, մնացյալ ամենը պայքարի իմիտացիա է, պարզապես նախկին օլիգարխը որոշել է ցույց տալ, թե իբր՝ չի հանձնվել առանց մարտի։ Իրականում Աբովյանը հանձնել են դեռ այն ժամանակ, երբ հորիզոնում հայտնվեց նախկին պատգամավոր և Ծառուկյանի թիկնապահ Էդուարդ Բաբայանի «թափով» կերպարը՝ որպես ԲՀԿ-ի նախընտրական ցուցակի թիվ 1 թեկնածու, իսկ Արման Աբովյանը հրապարակավ խոսեց այն մասին, որ ԲՀԿ-ն, իբր, չի հրաժարվել ՏԻՄ ընտրություններին մասնակցելուց…