Ալեքսանդր ԻՍԿԱՆԴԱՐՅԱՆ․ ԻՆՉՊԵՍ ՈՒԶՈՒՄ ԵՔ ԱՆՎԱՆԵՔ․ ՀԱՐՑՆ ԱՐԴԵՆ ԼՈՒԾՎԱԾ Է, ՏԵԽՆԻԿԱԿԱՆ ԽՆԴԻՐՆԵՐՆ ԵՆ ՔՆՆԱՐԿՎՈՒՄ
«Պարտությունից հետո Հայաստանի նկատմամբ ճնշում է գործադրվում՝ հաջորդ փուլն իրականացնելու համար։ Ճնշումը մեծ է, կոնսոլիդացված։ Դա են ցանկանում ադրբեջանցիները, թուրքերը, չէ՞ որ խոսքը Ադրբեջանից Թուրքիա ճանապարհի մասին է, ի՞նչ կարիք կա այդ խնդիրը խոսքերով կոծկել։ Դա են ցանկանում ԵԱՀԿ ՄԽ բոլոր 3 համանախագահները և, ինչն ավելի կարևոր է, դա է ցանկանում Ռուսաստանը։ Այս առումով Հայաստանի նկատմամբ ճնշումը փոքր չէ»,- 24news.am-ի հետ զրույցում կարծիք է հայտնել քաղաքագետ Ալեքսանդր Իսկանդարյանը՝ տարածաշրջանում կոմունիկացիաների, ճանապարհների բացման գործընթացի շուրջ զարգացումների վերաբերյալ։
Քաղաքագետն ընդգծել է, որ այս գործընթացում տերմինները, բառերը վճռորոշ դեր չեն խաղում, քաղաքական դիսկուրսում հստակ տերմիններից խուսափելն իրականությունը չի փոխում։
«Տերմինների պայքար է գնում, բառերի պայքար։ Ինչպես ուզում եք դա անվանեք՝ միջանցք, ճանապարհ, թեկուզ՝ կածան։ Խոսքը Ադրբեջանից Թուրքիա ուղեգծի մասին է՝ Հայաստանի տարածքով, որի անվտանգությունը պետք է ապահովվի ոչ հայերի կողմից։ Համաշխարհային պրակտիկայում այդպիսի ուղեգծերը «միջանցք» են կոչվում։ Աստծու սիրույն, թող դա «միջանցք» չկոչեն, բայց խոսքը հենց դրա մասին է»,- ընդգծել է Ալեքսանդր Իսկանդարյանը։
Նա կարծիք է հայտնել, որ հարցն իր լուծումը, փաստացի, արդեն գտել է, այժմ ընթացակարգային քայլեր են արվում։
«Կարծում եմ՝ հարցն արդեն լուծված է, և այնտեղ արդեն տեխնիկական հարցերն են քննարկում՝ ինչպես է պետք կառուցել, ով է կառուցելու, փաստաթղթաշրջանառությունն ինչպես է կատարվելու և այլն։ Վերջերս համաժողովներից մեկի ժամանակ նույն բանն էի ասում, և ինձ հարցրին՝ ինչպե՞ս եք ասում, որ հարցը լուծված է, եղե՞լ են արդյոք պաշտոնական հայտարարություններ։ Եղել են՝ տասնյակներով։ Մարդիկ ասում են՝ մենք բացելու ենք՝ Օրդուբադով և այլն, բայց բառը, տերմինը չեն արտաբերում, և հասկանալի է դառնում, որ դա պարզապես անխուսափելի է»,- ասել է քաղաքագետը։