Իրանի ԱԳՆ-ն Հայաստանին և Ադրբեջանին իրավիճակի կարգավորման կոչ է արել

Իրանի արտաքին գործերի նախարարությունը մտահոգություն է հայտնել հարևան Հայաստանի և Ադրբեջանի սահմանին իրավիճակի սրման կապակցությամբ:

Իրանի արտաքին քաղաքական գերատեսչության ներկայացուցիչ Սաիդ Խաթիբզադեն կոչ է արել Երևանին ու Բաքվին հակամարտությունը կարգավորել երկխոսության միջոցով:

Նշենք, որ ՀՀ ԱԳ նախարարությունն ավելի վաղ հայտնել էր, որ Ադրբեջանի զինված ուժերը ներխուժել են հայկական տարածք, իսկ Հայաստանի պաշտպանության նախարարությունը տեղեկացրել է 12 հայ զինծառայողի գերեվարվելու և 2 մարտական դիրքի կորցնելու մասին։

«Սաիդ Խաթիբզադեն, մտահոգություն հայտնելով Հայաստանի և Ադրբեջանի սահմանին նոր ռազմական բախումների կապակցությամբ, կոչ է արել երկրներին զսպվածություն ցուցաբերել և զերծ մնալ հակամարտության սրումից»,–ասված է հայտարարության մեջ, որը հրապարակվել է Իրանի արտաքին քաղաքական գերատեսչության Telegram-ի ալիքում, տեղեկացնում է Sputnik Արմենիա-ն:

ԱԳՆ ներկայացուցիչը, նշելով 2 երկրի միջազգայնորեն ճանաչված սահմանները հարգելու անհրաժեշտությունը, կողմերին կոչ է արել իրավիճակը կարգավորել երկխոսության և խաղաղ ճանապարհով։ Խաթիբզադեն նաև հայ-ադրբեջանական սահմանին տեղի ունեցող իրադարձությունները վտանգավոր է համարել տարածաշրջանում խաղաղության համար և Իրանի պատրաստակամությունն է հայտնել՝ աջակցել հակամարտության կարգավորմանը: