Մոսկվան և Անկարան քննարկել են տիեզերքում համագործակցության միջկառավարական համաձայնագրի նախապատրաստումը

Մոսկվան և Անկարան քննարկել են տիեզերքի հետախուզման և խաղաղ նպատակներով օգտագործման ոլորտում համագործակցության մասին միջկառավարական համաձայնագրի նախապատրաստումը, հայտնում է ՏԱՍՍ-ը։

«Ռոսկոսմոս»-ի պատվիրակությունը՝ տիեզերքում միջազգային համագործակցության հարցերով ՌԴ նախագահի հատուկ ներկայացուցիչ, պետական կորպորացիայի գլխավոր տնօրեն Դմիտրի Ռոգոզինի գլխավորությամբ, հանդիպել է թուրքական տիեզերական գործակալության ղեկավար Սերդար Հուսեյն Յըլդըրըմի և Թուրքիայի արդյունաբերության ու տեխնոլոգիաների նախարար Մուստաֆա Վարանքի հետ։

Կողմերը քննարկել են երկկողմ համագործակցության հեռանկարային ոլորտները և նախանշել դրանց իրականացման գործնական քայլերը։ Առանձին-առանձին գործընկերները կենտրոնացել են Ռուսաստանի Դաշնության կառավարության և Թուրքիայի Հանրապետության կառավարության միջև խաղաղ նպատակներով տիեզերքի հետախուզման և օգտագործման ոլորտում համագործակցության մասին համաձայնագրի նախապատրաստման վրա:

Այս փաստաթուղթը պետք է իրավական հիմք դառնա հետագա համատեղ աշխատանքի համար։

Համաձայնագիրը թույլ կտա երկու երկրներին զարգացնել փոխշահավետ համագործակցություն՝ օդաչուավոր տիեզերական հետազոտության, տիեզերական տեխնոլոգիաների, տիեզերքում գիտական հետազոտությունների, մոլորակների հետազոտությունների, Երկրի հեռահար զոնդավորման, տիեզերական մոնիտորինգի, արբանյակային նավիգացիայի, հեռահաղորդակցության և կապի ոլորտներում, տեղեկացնում է News.am-ը: