Փաստաբան. պետությունը պետք է փոխհատուցի Ռոբերտ Քոչարյանի ապօրինի ձերբակալության համար
Պետությունը պետք է փոխհատուցի ՀՀ երկրորդ նախագահ Ռոբերտ Քոչարյանի ապօրինի ձերբակալության համար։ Այս մասին «Հայելիի» հետ զրույցում ասել է նախկին նախագահի փաստաբան Հայկ Ալումյանը։
«Քանի որ դատարանները միշտ շեշտել են, որ կալանքը պայմանավորված է 300.1 հոդվածով։ Նախնական փուլում մեղադրանքը միայն այս հոդվածով էր։ Եթե միայն դատախազներն ու քննիչները ժամանակին հասկանային հոդվածի սահմանադրականության հարցը, բայց դա չարեցին։ Եթե այն ժամանակ այս մեղադրանքը չլիներ, ապա պարոն Քոչարյանը չէր կալանավորվի։ Երբ Սիլվա Համբարձումյանին առնչվող մեղադրանքը հայտնվեց, դատարաններն անընդհատ շեշտում էին, որ կալանավորման պատճառը 300.1 հոդվածն է։ Ուստի, հիմք ընդունելով դատարանի որոշումը՝ պետությունը պետք է փաստի, որ պարոն Քոչարյանը կալանքի տակ է գտնվել ապօրինի մեղադրանքով։ Պետությունը պետք է ճանաչի պարոն Քոչարյանի իրավունքները և փոխհատուցի։ Թե ինչ ծավալով կլինի այդ փոխհատուցումը և ինչպես կվարվի պարոն Քոչարյանը դրա հետ, նա կորոշի»,-ասաց փաստաբանը։
Խոսելով գրավի մասին՝ փաստաբանն ընդգծեց, որ այս խափանման միջոցը կիրառվել է, թեև բոլորին պարզ էր, որ Քոչարյանը թաքնվելու մտադրություն չունի, ինչի մասին վկայում են նրա բազաթիվ այցերը Մոսկվա, իսկ ամենակարևորը՝ դատավարության ամենասկզբում ինքնակամ ժամանումը։ «Գրավի նման մեծ չափը սահմանվեց նաև հաշվի առնելով 300.1 հոդվածով առաջադրված մեղադրանքը։ Այժմ այս հոդվածով մեղադրանքներ չկան, սակայն գրավի չափը չեն փոխում։ Անհնար է որևէ սթափ բացատրություն գտնել։ Պարզապես չեն ուզում ու չեն փոխում: Որովհետև ինչ-որ մեկն ասել է, որ չանեն դա: Բայց աստիճանաբար ամեն ինչ իր տեղը կընկնի։ Կհաստատվի, որ խափանման միջոցներ ընդհանրապես չպետք է լինեն, առավել ևս՝ 2 մլրդ դրամի չափով»,- ընդգծեց Ալումյանը։
Փաստաբանը հիշեցրեց, որ ՄԻԵԴ բազմաթիվ բողոքներ են ներկայացվել։ «Ցավով եմ արձանագրում, որ անարդարությունը, որին ականատես եղանք ավելի քան երեք տարի, և մեխանիզմները, որոնք ներդրվել են դատական համակարգն ավելի հնազանդ դարձնելու համար, այս ամենը կշրջվի նրանց դեմ, ովքեր դա արել են»,- եզրափակեց Հայկ Ալումյանը, տեղեկացնում է News.am-ը։
