Իրանի ԱԳՆ-ն հայտնել է միջուկային համաձայնագրին վերադառնալու շուրջ Վիեննայի բանակցություններում առաջընթացի մասին
Իրանի միջուկային ծրագրի շուրջ Գործողությունների համատեղ համապարփակ ծրագրի վերահաստատման նպատակով Վիեննայի բանակցությունների բոլոր մասնակիցները ձգտում են հասնել հուսալի եւ կայուն համաձայնության: Այս մասին երկուշաբթի օրը՝ ելույթ ունենալով Թեհրանում կայացած ճեպազրույցում, հայտարարել է Իսլամական Հանրապետության արտաքին գործերի նախարարության պաշտոնական ներկայացուցիչ Սայիդ Հաթիբզադեն, փոխանցում է ԻՌՆԱ-ն։
«Վիեննայում ընթացող խորհրդակցությունների ժամանակ դրական մթնոլորտ է տիրում»,-ասել է նա՝ նշելով, որ լավ առաջընթաց են արձանագրել քննարկվող չորս հարցերի շուրջ՝ պատժամիջոցների վերացում, միջուկային դոսյե, ստուգման մեխանիզմ եւ երաշխիքների ստացում։
Իր հերթին Իրանի արտաքին գործերի նախարար Հոսեյն Ամիր Աբդոլլահիյանը ազգային հեռուստառադիոընկերությանը տված հարցազրույցում ասել է, որ Վիեննայի բանակցությունները «ուղղված են ապահովելու ԱՄՆ-ի պատասխանատու վերադարձը միջուկային համաձայնագրով իր պարտավորություններին»: Նա ասել է, որ Թեհրանի եւ Վաշինգտոնի միջեւ տեղի է ունենում հաղորդագրությունների ոչ պաշտոնական փոխանակում։ «Մենք նշում ենք, որ ամերիկյան առաջարկներն ավելի իրատեսական են դարձել»,-ասել է իրանցի նախարարը։
Հունվարի 3-ին Ավստրիայի մայրաքաղաքում ամանորյա ընդմիջումից հետո վերսկսվել է բանակցությունների ութերորդ փուլը, որի նպատակն է վերստեղծել ԳՀՀԾ-ն իր սկզբնական տեսքով եւ ԱՄՆ-ին վերադարձնել այս բազմակողմ համաձայնագրին։
News.am
