Խաղատների ու շահումով խաղերի գովազդը Հայաստանում կարող է արգելվել

Ազգային ժողովն այսօր 56 «կողմ», 8 «դեմ», 16 «ձեռնպահ» ձայներով առաջին ընթերցմամբ ընդունեց «Գովազդի մասին» օրենքում լրացումներ և փոփոխություններ կատարելու մասին նախագիծը։

Կառավարության առաջարկած օրինագծով արգելվում է շահումով բոլոր խաղերի, այդ թվում՝ ինտերնետ շահումով խաղերի, խաղատների, խաղասրահների ու տոտալիզատորների բոլոր տեսակի գովազդները՝ ռադիոյով, հեռուստատեսությամբ, համացանցով, բացառությամբ իրենց պաշտոնական կայքերում, խաղատների, խաղասրահների, բուքմեյքերայան գրասենյակների շենքերի, սրահների վրա փակցվող գովազդներից:

Թույլատրվում է գովազդներ տեղադրել նաև ՀՀ սահմանային մուտքի կետերում, առնվազն չորսաստղանի հյուրանոցներում ու վիճակախաղերի վաճառակետերում։

Նշենք, որ երեկ՝ հունվարի 20-ին, նախագծի քննարկման ժամանակ «Քաղաքացիական պայմանագիր» խմբակցության պատգամավոր Բաբկեն Թունյանը հայտնել էր, որ Հայաստանում 2021 թվականի հունվար-նոյեմբերին կատարվել է 3,2 տրիլիոն դրամի խաղադրույք:

Պաշտոնական վիճակագրության համաձայն` 2020 թվականին միայն համացանցով կատարված խաղադրույքները ծավալը 2018թ.-ի համեմեատ ավելացել է 6 անգամ, իսկ խաղացողների թիվը՝ 3 անգամ, տեղեկացնում է Sputnik Արմենիա։