Բաքվի «կառուցողական» պատասխանը Հայաստանի առաջարկին. Ինչ ուզում, այն էլ անում ենք
Ադրբեջանի արտաքին գործերի նախարար Ջեյհուն Բայրամովը վերջակետ դրեց սահմանազատման և սահմանագծման հետ կապված կառուցողական լուծման Բաքվի պատրաստակամության հարցում։
Ավելի վաղ հաղորդվել էր, որ Ադրբեջանը մերժել է հայկական կողմի առաջարկները։
«Երկու շաբաթ առաջ Հայաստանը նոր առաջարկներ արեց Ադրբեջանի հետ սահմանի սահմանազատման վերաբերյալ»,- ասել է Բայրամովը Հունգարիայի արտաքին գործերի և առևտրի նախարար Պետեր Սիյարտոյի հետ համատեղ ասուլիսին, հաղորդում են ադրբեջանական լրատվամիջոցները։
«Նրա խոսքով՝ հայկական կողմը որոշակի պայմաններ է դրել Ադրբեջանի և Հայաստանի միջև սահմանի սահմանազատման և սահմանագծման հանձնաժողովի աշխատանքները սկսելու համար։ «Ադրբեջանը հայտարարել է, որ կարող է սկսել այս գործընթացը, բայց՝ առանց որևէ պայմանի»,- ընդգծել է Բայրամովը՝ հավելելով, որ սահմանների սահմանազատման հարցում «կրեատիվ» մոտեցումների կարիք չկա։ «Միջազգային սահմանները պետք է ճանաչվեն. Հայաստանը, որը 30 տարի օկուպացրել է ադրբեջանական հողերը, իրավական, քաղաքական կամ բարոյական իրավունք չունի որևէ պայման դնելու սահմանների սահմանազատման հարցում»,- եզրափակել է Բայրամովը, ԶԼՄ-ները մեջբերում են նրա խոսքերը:
Ակնհայտ է, որ նշված «պայմաններից» մեկը վերաբերում է Հայաստանի ինքնիշխան տարածք ներխուժած ադրբեջանական ստորաբաժանումների դուրսբերմանը, տեղեկացնում է News.am-ը։
