Մաքսային ձևակերպումների մասնագետները դեմ են ՊԵԿ նախագահի նոր հրամանին (ՏԵՍԱՆՅՈՒԹ)

Մաքսային ներկայացուցչական կազմակերպությունների աշխատակիցները բողոքի ակցիա են իրականացնում ՊԵԿ Արարատյան մաքսատան դիմաց։ Նրանք բողոքում են ՊԵԿ նախագահի հրամանի դեմ, որով փոխվել է մաքսային ձևակերպումների մասնագետներին վկայականներ տրամադրելու կարգը։

 

ՊԵԿ նախագահի ստորագրած հրամանը ուժի մեջ է մտել հունվարի 27-ից։ Նոր հրամանի համաձայն, մաքսային ձևակերպումների մասնագետի որակավորման քննություններն այսուհետ կազմակերպվելու են տարեկան առնվազն երկու անգամ՝ ամսական պարբերականության փոխարեն։ Մինչև քննությունը, մաքսային ձևակերպումների մասնագետները պետք է մասնակցեն դասընթացի։

Իսկ այն քաղաքացիները, որոնք արդեն ունեն վկայական, նրանք պետք է վեցամսյա ժամկետում վերապատրաստվեն։ Հակառակ դեպքում վկայականների գործողությունը կդադարի։

Մինչև այս նոր հրամանը, մաքսային ձևակերպումների մասնագետներին վկայական տրվում էր անժամկետ, բայց պայմանով, որ 3 տարվա ընթացքում առնվազն մեկ անգամ պետք է վերապատրաստման գնա՝ ՊԵԿ-ի սահմանված կարգով, տեղեկացնում է News.am։