ՀԱՊԿ․ Ուկրաինայի հարավ-արևելքում էսկալացիայի սպառնալիքը պահպանվում է

Ուկրաինայի հարավ-արևելքում էսկալացիայի սպառնալիքը պահպանվում է՝ արևմտյան գործընկերների կողմից Կիևին սպառազինություն մատակարարելու ֆոնին։ Այս մասին հայտարարել է ՀԱՊԿ միացյալ շտաբի պետ, գեներալ-գնդապետ Անատոլի Սիդորովը, հաղորդում է ՏԱՍՍ-ը։

Նա նշել է, որ ուկրաինական զինված ուժերի զարգացման վրա Արևմուտքի ազդեցության «բնորոշ ցուցանիշ» է դրանց «համապատասխանեցումը ՆԱՏՕ-ի ստանդարտներին»։

«Նշմարված ծրագրերի իրագործման համար ակտիվորեն ներգրավվում է արտաքին ֆինանսական և խորհրդատվական օգնություն, սպառազինության և ռազմատեխնիկայի մատակարարման շուրջ գործարքներ են կնքվում։ Այս տարվա հունվարից ԱՄՆ-ն մոտ 650 տոննա ռազմամթերք և ռազմական գույք է մատակարարել։ Այս ֆոնին տարածաշրջանային անվտանգության վիճակի վրա շարունակում է էական ազդեցություն ունենալ Ուկրաինայի հարավ-արևելքում զինված հակամարտությունը»,- ասել է Սիդորովը։

Սիդորովն ընդգծել է, որ այժմ Ուկրաինայում գտնվում են օտարերկրյա զինծառայողներ, ամերիկյան և եվրոպական մասնավոր ռազմական ընկերությունների ներկայացուցիչներ, ակտիվորեն ներգրավվում են ենթակառուցվածքները, պարբերաբար մարտական թռիչքներ են իրականացվում, այդ թվում ռազմավարական, ռմբակոծիչ և հետախուզական ավիացիայի ներգրավմամբ։

Նա ուշադրություն է հրավիրել Կիևի կողմից ազգային դիմադրության մասին օրենքի ընդունման վրա, ինչպես նաև հիշեցրել Ուկրաինայի նախագահ Վլադիմիր Զելենսկու՝ փետրվարի 1-ին ստորագրված հրամանագիրը երկրի պաշտպանունակության ամրապնդման մասին, ըստ որի՝ նախատեսվում է 3 տարում ավելացնել Ուկրաինայի ԶՈւ թվաքանակը 100 հազարով և ստեղծել 20 հավելյալ ռազմական բրիգադ։ «2022 թվականին նախատեսվում է ավելացնել պաշտպանական ծախսերը և անվտանգությունն ավելի քան 30%-ով։ Այս ամենը վկայում է երկրի ղեկավարության մոտ հարավ-արևելքում հակամարտությունը խաղաղ կարգավորելու ձգտման բացակայության մասին»,- հավելել է ՀԱՊԿ միացյալ շտաբի պետը, տեղեկացնում է News.am-ը։