Ալեքսանդր Իսկանդարյան. Բաքուն տարբեր հնարավորություններ է շոշափում, ստուգում է Ռուսաստանի արձագանքը
Ուկրաինայի պատերազմը կարող է ավարտվել Ռուսաստանի հաղթանակով, պատերազմը կարող է ավարտվել Ուկրաինայի հաղթանակով, ավելի ճիշտ նրանով, որ Ուկրաինան կդիմակայի, և պատերազմը կարող է ձգձգվել ու վերածվել երկար դիրքային հակամարտության։ Այս երեք սցենարների շրջանակներում զարգացման տարբեր տարբերակներ կարելի է կանխատեսել, որոնցից ցանկացածը վտանգավոր է Հարավային Կովկասի տարածաշրջանի, Հայաստանի, Արցախի համար։ Այս մասին NEWS.am-ի թղթակցի հետ զրույցում ասաց Կովկասի ինստիտուտի տնօրեն, քաղաքագետ Ալեքսանդր Իսկանդարյանը։
Սա, նրա խոսքով, հղի է հարավկովկասյան տարածաշրջանի հանդեպ Արևմուտքի և հատկապես Ռուսաստանի ուշադրության նվազմամբ, իսկ արտաքին ուժերի հետաքրքրության նվազումը հանգեցնում է տարածաշրջանային խաղացողների վերելքի։
«Տարածաշրջանային խաղացողն այստեղ Թուրքիան է։ Սա այնքան էլ բարենպաստ սցենար չէ, և այս սցենարով Ադրբեջանը կարող է փորձել որևէ մեկը այն հնարավորություննեից, որը նա կմեկնաբանի որպես Ռուսաստանի թուլացում այս տարածաշրջանում կամ Ռուսաստանի ուշադրության նվազում տարածաշրջանի հանդեպ։ Այժմ արդեն հստակ տեսնում ենք, որ Ադրբեջանը տարբեր հնարավորություններ է շոշափում, ստուգում է ռուսական կողմի արձագանքը այն ամենին, ինչ հիմա նա փորձում է անել։
Դա սկսվեց Բաքվում, այսպես կոչված, խաղաղ ցույցերից։ Ադրբեջանը բոլորովին նման չէ Հայաստանին, և դժվար է պատկերացնել, որ ուկրաինական դեսպանատան մոտ Ուկրաինայի աջակցության ցույցերը կարող են լինել ինչ-որ պատահական բան կամ կարող են լինել ակցիաներ, որոնք կազմակերպել են Ադրբեջանի գրեթե գոյություն չունեցող քաղաքացիական հասարակության ներկայացուցիչները՝ առանց պաշտոնական Բաքվի թույլտվության։ Դա նաև այն է, ինչ տեղի է ունենում Արցախի սահմանին, Հայաստանի սահմանին, գազի պատմությունը և այլն»,- նշեց քաղաքագետը։
Իսկանդարյանն ընդգծեց, որ Ադրբեջանը շոշափում է հողը, մինչ շոշափում է, ստուգում է, թե ինչպես են արձագանքում, որքան ամուր են կանգնած դիրքերում և այլն։
«Դա միանգամից չսկսվեց, որովհետև հենց սկզբում կային պատկերացումներ այն մասին, որ Ուկրաինայում պատերազմը կարող է բլիցկրիգ լինել, որ ամբողջ իրավիճակը կարող է շատ արագ ավարտվել։ Հետո պարզ դարձավ, որ դա այդպես չէ, որ հակամարտությունն առնվազն ձգձգվում է, և Ադրբեջանը որոշեց տարբեր տարբերակներ շոշափել։ Սա այնքան էլ բարենպաստ իրավիճակ չէ, պետք է պատրաստ լինել դրան։ Դրա համար պետք է շատ բան ինքնուրույն անել՝ ինչպես դիվանագիտական, այնպես էլ անվտանգության ոլորտում ջանքեր գործադրելով»,- եզրափակեց նա։