Պեսկով. Ուկրաինայի հետ բանակցությունները կանցկացվեն մարտի 14-ին

Ռուսաստանի և Ուկրաինայի միջև բանակցությունները կանցկացվեն մարտի 14-ին։ Այս մասին հայտարարել է Կրեմլի ներկայացուցիչ Դմիտրի Պեսկովը, փոխանցում է MK-ը։

Ավելի վաղ Reuters-ը, հղում անելով Ուկրաինայի նախագահ Վլադիմիր Զելենսկու անանուն խորհրդականին, հայտնել էր, որ բանակցությունները կիրակի երեկոյան են տեղի ունենում։

«Ոչ։ Բանակցությունները նախատեսված են վաղը»,- մեկնաբանել է Պեսկովն այս տեղեկությունը։

Հիշեցնենք, որ ռուսական և ուկրաինական պատվիրակությունները արդեն երեք անգամ հանդիպել են Բելառուսում։ Կողմերը, ի թիվս այլ հարցերի, քննարկել են մարդասիրական միջանցքների բացման հարցը։ Զելենսկու աշխատակազմի ղեկավարի խորհրդական Միխայիլ Պոդոլյակը հայտնել է, որ բանակցություններ նաև տեսաձևաչափով են ընթանում, տեղեկացնում է News.am-ը։