Սթոլթենբերգ․ ՈՒկրաինական պատերազմը կարող է վերաճել միջուկային առճակատման Մոսկվայի և Արևմուտքի միջև

ՆԱՏՕ-ն զգուշացրել է, որ ուկրաինական պատերազմը կարող է վերաճել միջուկային առճակատման Մոսկվայի և Արևմուտքի միջև, հայտնում է Reuters-ը։

«Ռուսաստանը պետք է դադարեցնի միջուկային այս վտանգավոր անպատասխանատու հռետորաբանությունը»,- մամուլի ասուլիսում ասել է ՆԱՏՕ-ի գլխավոր քարտուղար Յենս Սթոլթենբերգը։ «Սակայն թող կասկածներ չլինեն պաշտպանվելու և դաշնակիցներին ցանկացած սպառնալիքից ցանկացած պահի պաշտպանելու մեր պատրաստակամության հարցում»:

«Ռուսաստանը պետք է հասկանա, որ երբեք չի հաղթի միջուկային պատերազմում»,- ասել է նա Բրյուսելում դաշինքի առաջնորդների գագաթաժողովի նախօրեին: «ՆԱՏՕ-ն հակամարտության մաս չէ…նա աջակցում է Ուկրաինային, բայց հակամարտության մաս չէ…ՆԱՏՕ-ն զորքեր չի մտցնի Ուկրաինա… Շատ կարևոր է Ուկրաինային աջակցությունը, և մենք ավելացնում ենք այն: Բայց միևնույն ժամանակ չափազանց կարևոր է թույլ չտալ, որ այս հակամարտությունը վերածվի ՆԱՏՕ-ի և Ռուսաստանի միջև լիարժեք պատերազմի», տեղեկացնում է News.am-ը։