ՕՊԵԿ-ը չի կարողանա փոխհատուցել ռուսական նավթի մատակարարումների հնարավոր կորուստը

ՕՊԵԿ-ը ԵՄ-ին հայտարարել է, որ Ռուսաստանի դեմ ընթացիկ և ապագա պատժամիջոցները կարող են պատմության մեջ ամենալուրջ ցնցումը լինել նավթի մատակարարումների համար, և այդ ծավալներն անհնար կլինի փոխհատուցել:

ՕՊԵԿ-ի գլխավոր քարտուղար Մոհամմադ Բարկինդոն այս մասին հայտարարել է ԵՄ պաշտոնատար անձանց հետ հանդիպմանը։

Գործող և ապագա պատժամիջոցների կամ գնորդների կողմից բոյկոտի պատճառով ռուսական նավթի մատակարարումների կորուստները կարող են գերազանցել օրական 7 մլն բարելը, հայտարարել է Բարկինդոն: Սա ՕՊԵԿ-ի հնարավորություններից շատ վեր է, ասել է նա ԵՄ էներգետիկայի հանձնակատար Քադրի Սիմսոնին, որը պնդել է, որ կարտելը պատասխանատվություն է կրում շուկայի հավասարակշռման համար:

Սիմսոնը հայտարարել է, որ ՕՊԵԿ-ի խումբը կարող է օգտագործել իր առկա պահեստային արտադրական հզորությունները ճգնաժամին օգնելու համար, հաղորդում է Bloomberg-ը: Բարկինդոն ասել է, որ շուկաները քաղաքական գործոնների ազդեցության տակ են, այլ ոչ թե առաջարկի և պահանջարկի, ուստի կազմակերպությունը քիչ բան կարող է անել:

«Այս ճգնաժամերը խորացել են՝ ստեղծելով խիստ անկայուն շուկա»,- ասել է Բարկինդոն: «Ես պետք է նշեմ, որ դրանք ոչ հիմնարար գործոններ են, որոնք լիովին դուրս են ՕՊԵԿ-ում մեր վերահսկողությունից»:

ՕՊԵԿ-ի երկրները մերժել են Ռուսաստանի թողած բացը լրացնելու և նավթի արդյունահանումն ավելացնելու այնպիսի խոշոր սպառողների կոչերը, ինչպիսին ԱՄՆ-ն է, տեղեկացնում է News.am-ը: