«Առանց Թրեյսի Հայաստա՛ն». «Դիմադրություն» շարժման անդամները «Մարիոթի» մոտ են (ՏԵՍԱՆՅՈՒԹ)

«Դիմադրություն» շարժման անդամներն ու նրանց կողմնակիցները Հանրապետության հրապարակում են` «Մարիոթ» հյուրանոցի մոտ, որտեղ ժամանելու են ՀՀ վարչապետ Նիկոլ Փաշինյանը և ՀՀ-ում ԱՄՆ դեսպան Լին Թրեյսին։

Շարժման անդամները շրջափակել են հյուրանոցի 2 մուտքերն ու վանկարկում են՝ «Առանց Թրեյսի Հայաստա՛ն»։

Նշենք, որ «Մարիոթ» հյուրանոցում տեղի է ունենալու Հայաստանում խոսքի ազատության, մամուլի, քաղաքացիական կազմակերպությունների միությունների համաժողով։

Ընդդիմադիրներն այստեղ պատրաստվում են փաստեր ներկայացնել, որ ՀՀ-ում մամուլը և խոսքի ազատությունը ոտնահարված են։

Տեղում կուտակված են նաև բազմաթիվ ոստիկաններ։

Նշենք, որ օրեր առաջ «Արմենպրես» լրատվական գործակալությանը տված հարցազրույցում Թրեյսին ասել էր, որ ԱՄՆ-ն հանձնառու է օգնել հայ ժողովրդին` կառուցելու այնպիսի ապագա, որի հիմքում ընդհանուր ժողովրդավարական արժեքներն են ու այն ճանապարհը, որը հայ ժողովուրդն ընտրել է 2018 թվականին ու վերահաստատել 2021-ի ընտրություններին։

Հատկապես այս հայտարարությունը բողոքի ալիք է բարձրացրել ընդդիմադիրների և նրանց կողմնակիցների շրջանում։

«Անհարգալից վերաբերմունքի համար Ամերիկայի դեսպանը պետք է հետ կանչվի։ Վերցրե՛ք ձեր մարդու իրավունքների երեսպաշտներին ու հեռացե՛ք ժողովրդավար և մարդու իրավունքները պաշտպանող Հայաստանից»,- նշեց ընդդիմադիրներից մեկը, տեղեկացնում է Sputnik Արմենիա-ն։