Վճռաբեկը վարույթ է ընդունել Բորիս Բախշիյանին կալանավորելու որոշման դեմ պաշտպանների բողոքները
Փաստաբան Արսեն Սարդարյանը ֆեյսբուքյան գրառում է արել, որում ասվում է, որ Վճռաբեկ դատարանը վարույթ է ընդունել Սյունիքի մարզի ընդհանուր իրավասության դատարանի դատավոր Բորիս Բախշիյանին կալանավորելու՝ Վերաքննիչ դատարանի որոշման դեմ պաշտպանների վճռաբեկ բողոքները։
«Դատավոր Բորիս Բախշիյանի գործով երկու նորություն ունենք՝
1. Վճռաբեկ դատարանը վարույթ է ընդունել Բորիս Բախշիյանին կալանավորելու վերաբերյալ Վերաքննիչ դատարանի որոշման դեմ պաշտպանների բերած վճռաբեկ բողոքները,
2. Վարույթ իրականացնող մարմինը անհիմն և չպատճառաբանված որոշմամբ մերժել է գլխավոր դատախազին հասցեագրված, սակայն հետագայում քննիչին մակագրված, Բ. Բախշիյանի նկատմամբ քրեական հետապնդումը դադարեցնելու վերաբերյալ միջնորդությունը, գործը ուղարկվում է դատարան»,– գրել է նա:
Հիշեցնենք՝ այս տարվա փետրվարի 7-ին Երևան քաղաքի ընդհանուր իրավասության դատարանը, նախագահությամբ դատավոր Դավիթ Արղամանյանի, որոշում էր կայացրել կալանավորել դատավոր Բորիս Բախշիյանին։ Մայիսի 7-ին նա ազատ էր արձակվել։
Դատավորը մեղադրվում է անձին ակնհայտ ապօրինի կալանավորելու համար, որն առաջացրել է ծանր հետևանքներ:
Բորիս Բախշիյանն այն դատավորն է, ում որոշմամբ փոխվել էր «Սիսական» ջոկատի հրամանատար Աշոտ Մինասյանի՝ Աշոտ Երկաթի խափանման միջոց կալանքը, և նա ազատ էր արձակվել գրավի դիմաց։ Նրա որոշումներով գրավի դիմաց ազատ էին արձակել նաև Քաջարանի համայնքապետ Մանվել Փարամազյանը, Գորիսի փոխքաղաքապետ Մենուա Հովսեփյանը։
News.am