Հրաչ ՊՈՂՈՍՅԱՆ․ ԵՐԵՎԱՆԻ ՀԵՏԱԳԱ ԸՆԴԱՐՁԱԿՈՒՄԸ ԿԱՐՈՂ Է ՀԱՆԳԵՑՆԵԼ ԱՂԵՏԻ

Եթե Երևանի հետագա ընդարձակումը չկանգնեցվի, ապա դա կարող է հանգեցնել աղետալի հետևանքների։ Այս մասին հունիսի 24-ին լրագրողների հետ հանդիպմանն ասել է վաստակավոր ճարտարապետ Հրաչ Պողոսյանը։

Ռիսկերը

Երևանը գտնվում է սեյսմիկ վտանգավոր գոտում, ուստի այստեղ հավաքել երկրի բնակչության մեծ մասին՝ նշանակում է այդ բնակչությանը ենթարկել սպառնալիքի։

Բացի այդ, ռազմական ագրեսիայի դեպքում հեշտ է ոչնչացնել երկրի ռազմավարական օբյեկտները, քանի որ դրանք բոլորը կենտրոնացած են մի տեղում։ Չլինի Երևանը՝ չի լինի հանրապետությունը։ Սա սխալ է։

Պողոսյանը նկատել է, որ քաղաքաշինությունն ազդում է բոլոր ոլորտների վրա՝ տնտեսության, տրանսպորտի, արդյունաբերության և այլն։ Այսօր Երևանին անմիջականորեն հարող տարածքի հարյուրավոր հեկտարներ են կառուցապատվում։ Դա անմիջապես կփոխի իրավիճակը մայրաքաղաքում բոլոր իմաստներով։

Բացի այդ, բնակելի թաղամասերի շինարարության ժամանակ պետք է նախատեսվի մանկապարտեզների և հանրային այլ օբյեկտների որոշակի քանակություն՝ 1 000 մարդու հաշվարկով։

Այսօր նախատեսված 90 հազար մանկապարտեզներից Երևանի քաղաքապետարանի ռեեստրում 25 հազար մանկապարտեզ է գրանցված։ Այդ խախտումները հանգեցնում են սոցիալական ճգնաժամի և աղետի։ Այստեղ լուրջ դեր է հատկացված պետությանը, քանի որ մասնավոր ընկերությունները շահագրգռված են միայն բնակարաններ կառուցել, որոնք կարող են հեշտ ու արագ վաճառել։

Ինչի՞ն պետք է ուշադրություն դարձնել

20 տարով հաստատված Երևանի զարգացման գլխավոր հատակագծի գործողության ժամկետը լրացել է, և այսօր գլխավոր հատակագիծ չկա, նկատվում է կադրերի և գիտելիքների պակաս, չկան հստակ հաշվարկներ, չկա առաջիկա 10 տարվա գաղափար, որով կղեկավարվեին քաղաքային իշխանությունները։ Եթե համակարգ չկա, դժվար է հասնել լուրջ արդյունքների։ Ավելին, ամեն ինչ ինքնահոսի է մատնված, ինչը անկառավարելի իրավիճակ է ստեղծում։

Ճարտարապետը նշել է, որ Երևանի բնակչության թիվը ցերեկային և գիշերային ժամերին տարբերվում է. ցերեկը այդ թիվը կրկնապատկվում է՝ հասնելով 2 միլիոնի, ի հաշիվ քաղաքի շրջակա բնակավայրերից եկողների։

Ուստի, փորձագետը կոչ է արել հաշվի առնել բնակչության մասին հենց ցերեկվա տվյալները։ Անհրաժեշտ է մանրամասն ուսումնասիրել բոլոր դետալները (բնակելի ֆոնդը, մանկապարտեզների քանակությունը և այլն) և միայն դրա հիման վրա որոշում կայացնել։

Երևանի գլխավոր հատակագիծը նախագծելիս կարևոր է հաշվի առնել ամբողջ երկրի առանձնահատկությունները։

Թամանյանի նախագծերը ոչ մի ընդհանուր բան չունեն այսօրվա իրողությունների հետ։ Նրա նախագիծը հաշվարկված էր 30-40 տարվա և 150 հազար մարդ բնակչության համար։ Թամանյանը կարևորություն էր տալիս Երևանի և մարզերի ներդաշնակ զարգացմանը։ Բայց քաղաքի բնակչության թվաքանակի կտրուկ աճը հանգեցրեց ամբողջ երկրից ռեսուրսների կորզման։

News.am