ՄԱԿ-ի Գլխավոր ասամբլեայի նախագահն այցելել է Հայոց ցեղասպանության հուշահամալիր

Աշխատանքային այցով Հայաստանում գտնվող Միավորված ազգերի կազմակերպության Գլխավոր ասամբլեայի նախագահ Աբդուլա Շահիդն այցելել է Հայոց ցեղասպանության հուշահամալիր, հայտնում է ՀՀ արտգործնախարարությունը։

Շահիդը հարգանքի տուրք է մատուցել Ցեղասպանության զոհերի հիշատակին: Նա նաև շրջայց է կատարել Հայոց ցեղասպանության թանգարանում։

Հիշեցնենք, որ երեկ Շահիդը հանդիպել էր ԱԺ փոխնախագահ Ռուբեն Ռուբինյանի հետ։

ՄԱԿ-ի Գլխավոր ասամբլեայի նախագահի գլխավորած պատվիրակությունը Հայաստանում կլինի հուլիսի 26-29-ը:

Հուշամատյանում Աբդուլա Շահիդը գրել է, որ ցնցված է թանգարան այցելությունից և շատ շնորհակալ է ջերմ ընդունելության համար։

Sputnik Արմենիա