«Ժողովուրդ». ԴԱՏԱԿԱՆ ՀԱՄԱԿԱՐԳԸ ԲԱԺԱՆՎԵԼ Է ԵՐԿՈՒ ՄԱՍԻ
«Ժողովուրդ» թերթը գրում է. «Ինչպես հայտնի է, երեկ տեղի է ունեցել Դատավորների ընդհանուր ժողովը, որի ժամանակ ՀՀ բարձրագույն դատական խորհրդի անդամ է ընտրվել դատավոր Նաիրա Հովսեփյանը: Ուշագրավ է, որ դատական համակարգի՝ մշտապես աղմուկ բարձրացրած, ճնշումների մասին խոսող դատավորները չեն եղել երեկվա ժողովին:»
«Ժողովուրդ» օրաթերթը ֆիքսեց, որ չկային Զարուհի Նախշքարյանը, Մխիթար Պապոյանը, Արման Հովհաննիսյանը, Վազգեն Ռշտունին և այլք, այսինքն՝ մշտապես դատական համակարգի վրա գործադրվող ճնշումների մասին բարձրաձայնող դատավորները բոկոտել էին նիստը:
Հետաքրքիր է, որ չէին եկել նաև աղմկահարույց գործեր քննող դատավորները: Նրանց թվում են դատավորներ Արման Դանիելյանը և Մնացական Մարտիրոսյանը: Ըստ էության, դատական համակարգը բաժանվել է երկու մասի, և այդ մասերի բաժանված դատավորների խմբերը ներկա չէին ժողովին. չէին եկել և ճնշումների մասին բարձրաձայնող դատավորները, և ճնշումների ենթարկված, աղմկահարույց գործեր քննող դատավորները:
Գուցե վերջինների դեպքում պատճառն այն է, որ լրագրողների հնարավոր հարցերից խուսափեն: Ամեն դեպքում, ունենք մի իրավիճակ, երբ դատական համակարգում կրկին մտահոգիչ իրավիճակ է, և ոլորտի կարևորագույն իրադարձությանը ոչ բոլորն են ներկա գտնվում»:
