Շոյգուն բանակցություններ է վարել ՀՀ պաշտպանության նախարարի հետ
Հայաստանի և Ռուսաստանի պաշտպանության նախարարներ Սուրեն Պապիկյանը և Սերգեյ Շոյգուն բանակցություններ են վարել Միջազգային անվտանգության մոսկովյան X համաժողովի շրջանակներում, հայտնում է ՌԴ ՊՆ մամուլի ծառայությունը։
«Մենք քննարկելու շատ բան ունենք, կան ավանդական հարցեր, որոնք վերաբերում են մեր ռազմատեխնիկական և ռազմական համագործակցությանը։ Եվ, իհարկե, Լեռնային Ղարաբաղում առաջադրանքներ կատարող մեր խաղաղապահ զորախմբի գործունեության հետ կապված հարցեր։ Մենք, ինչպես և դուք, շարունակում ենք վստահ լինել, որ հիմնական կայունացնող գործոնը հրադադարն է շփման գծի ամբողջ երկայնքով»,- բանակցությունների ժամանակ ասել է ՌԴ ռազմական գերատեսչության ղեկավարը։
Շոյգուն նաև շնորհակալություն է հայտնել Հայաստանից իր գործընկերոջը՝ Միջազգային բանակային խաղերի բացմանը և «Բանակ-2022» միջազգային ռազմատեխնիկական ֆորումին, ինչպես նաև միջազգային անվտանգության մոսկովյան համաժողովի աշխատանքներին մասնակցելու հնարավորության համար։
Պապիկյանը, իր հերթին, նշել է, որ այսօրվա հանդիպումն արդեն երկրորդն է տարեսկզբից, ինչը վկայում է հայ-ռուսական երկկողմ դաշնակցային փոխգործակցության բարձր մակարդակի մասին։
«Այս հանդիպումը շատ կարևոր է մեզ համար։ Մենք բարձր ենք գնահատում հայ-ռուսական համագործակցության ձեռք բերված մակարդակը, ինչպես նաև Ռուսաստանի ներկայության դերը Հարավային Կովկասում»,- ասել է ՀՀ ՊՆ ղեկավարը։
News.am